Sentyabrın 30-dan oktyabrın 3-dək Bakıda  “LiFFt-2019” IV Avrasiya ədəbi festivallar festivalı keçirilib. “Avrasiya Xalqları Assambleyası” beynəlxalq qeyri-hökumət təşkilatları ittifaqının dəstəyi ilə keçirilən festivalın təşkilatçıları Avrasiya xalqlarının “LiFFt” Mədəni Layihələrinin İnkişafına Dəstək Fondu və Heydər Əliyev Fondudur.

Genişmiqyaslı maarifçilik layihəsi olan “LiFFt” Avrasiya mədəni məkanının tamhüquqlu tərkib hissəsinə çevrilib. Avrasiya ədəbi festivallarını birləşdirən “LiFFt” 2016-cı ildən etibarən hər il keçirilir.

Builki festival 2019-cu ilin BMT tərəfindən elan edilmiş Yerli Xalqların Dilləri İli Proqramına və böyük Azərbaycan şairi və mütəfəkkiri İmadəddin Nəsiminin 650 illiyinə həsr edilib.

Festivalın məqsədi Avrasiya ölkələrində yazıçıların və oxucuların yaradıcılıq və dostluq əlaqələrini möhkəmlətmək, vahid Avrasiya ədəbi məkanı yaratmaqdır.

Festivalda Avrasiya ölkələrindən olan yazıçılar, şairlər, dramaturqlar, ədəbiyyat tənqidçiləri, mədəniyyət xadimləri iştirak ediblər.

“LiFFt-2019” Avrasiya festivalı çərçivəsində təşkil olunan müxtəlif bölmə iclasları, şeir, nəsr, maarif, tərcümə haqqında diskussiyalara AMEA Nizami Gəncəvi adına Milli Azərbaycan Ədəbiyyatı Muzeyinin bir qrup əməkdaşı da qatılıb. Muzey əməkdaşları “Avrasiya məkanında mədəniyyətlərarası əməkdaşlıq”, “Ədəbiyyatın gələcəyi: Yazıçılar və oxucular birliyi”, “Qitə ilə qitə: insan, dil və ədəbi hüdudsizluğun ölçülməsi” və s. mövzularda müzakirələrdə iştirak edərək, Qazaxıstan, Rusiya,Türkiyə, Kolumbiya, Yunanıstan, Polşa, Yaponiya, Böyük Britaniya, Fransa, Azərbaycan və digər ölkələrin ictimai xadim, alim və ədəbi simalarının fəaliyyətinə dair çıxışlar ediblər. 

Qeyd edək ki, festival günlərində, həmçinin Milli Azərbaycan Ədəbiyyatı Muzeyinin təşkilatçılığı ilə Dendrologiya İnstitutunda yerləşən Sergey Yesenin adına Azərbaycan-Rusiya Ədəbi Əlaqələr Mərkəzində böyük rus şairi Sergey Yeseninin anadan olmasının 124-cü ildönümü də qeyd olunub. Tədbirdə festivalın fəxri qonaqlarından olan şair-filosof, 2016-cı il Ədəbiyyat Festivalının laureatı Konstantin Kedrov və şair Konstantin Sviridov da iştirak ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.