AMEA Nizami Gəncəvi adına Milli Azərbaycan Ədəbiyyatı Muzeyində XVI əsr Azərbaycan ədəbiyyatı mühitinin tanınmış simalarından biri, böyük sərkərdə, filosof və şair Məhəmməd Bayram xana həsr olunan elmi seminar keçirilib.

Tədbirdə muzeyin Qədim və Orta əsrlər Azərbaycan ədəbiyyatının tədqiqi və təqdimi şöbəsinin elmi işçisi, filologiya üzrə fəlsəfə doktoru İlhamə Gültekin Məhəmməd Bayram xanın həyat və fəaliyyətindən geniş bəhs edib. Bildirib ki, Azərbaycan ədəbiyyatı tarixində saray titulları, zərif məhəbbət lirikası və şeirlər “Divan”ı ilə iz qoyan Məhəmməd Bayram xan Qaraqoyunlular dövlətinin türkəsilli məşhur Baharlı tayfasına mənsub idi.

Məruzəçi taleyi daha çox Böyük Moğol imperiyası ilə bağlanan Azərbaycan şairinin hələ gənc yaşlarından müxtəlif silah növlərilə məşğul olduğunu, şeir və musiqi sənətinin incəliklərinə yiyələndiyini və Şah İsmayıl, Şah Təhmasib, moğol şahları Babur və Humayun saraylarında böyük rəğbət və mənsəb sahibi olduğunu vurğulayıb. Qeyd edib ki, Bayram xanın türk və farsca şeirlərdən ibarət 1950 misralıq lirik yaradıcılığı ilk dəfə 1910-cu ildə Kəlküttədə çap olunub. “Divan”ının ən qədim nüsxəsi isə Britaniya Muzeyində qorunur.

Seminar məşğələsi muzeyin elmi işlər üzrə direktor müavini, professor Xatirə Bəşirli, Ədəbi mərasimlər və nəşrlər şöbəsinin elmi işçisi Tutu Məmmədova,  Yeni və müasir Azərbaycan ədəbiyyatının tədqiqi və təqdimi şöbəsinin kiçik elmi işçisi Munisə İsmayılova, Qədim və Orta əsrlər Azərbaycan ədəbiyyatının tədqiqi və təqdimi şöbəsinin böyük laborantı Gülnar Əqiq və digərlərinin sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.