AMEA Nizami Gəncəvi adına Milli Azərbaycan Ədəbiyyatı Muzeyində keçirilən növbəti elmi seminar məşğələsi Azərbaycan mifik təfəkkür tərzinin bir qolu olan totemizm və onun bədii nümunələrdəki tarixi izi məna dəyərlərinə həsr edilib.

Tədbirdə muzeyin Ədəbi mərasimlər və nəşrlər şöbəsinin kiçik elmi işçisi Təranə Rüstəmova “İbtidai inanclarda alleqorik ünsürlər” adlı tədqiqat mövzusunda məruzə ilə çıxış edib. Məruzəçi qədim xalq inancları və fəlsəfəsindən süzülüb gələn animist obrazların təmsil, nağıl, əsatir kimi bədii formalarda təzahür şəklindən danışıb, heyvan kultuna söykənən məşhur Azərbaycan nağıllarının timsalında qurd, at, it, və yaxud onqon – Qızılquş, Zümrüd, Simurq kimi əfsanəvi quş inancların təşəkkül və bədii obrazlılıq tarixi haqqında məlumat verib. Qeyd edib ki, beləcə ayrı-ayrı folklor nümunələrində həyat qazanmış alleqorik ünsürlər sonralar yazılı ədəbiyyat nümunələrinə də nüfuz edərək Xaqani, Nizami, Xətai, Füzuli və digər sənətkarların yaradıcılığında bünövrəsini ağız ədəbiyyatından götürən, xalq təmsillərindən qidalanan mövzu və süjetlərə çevrilib.

Seminar məşğələsi muzeyin elmi işlər üzrə direktor müavini, filologiya üzrə elmlər doktoru, professor Xatirə Bəşirli, Ədəbi mərasimlər və nəşrlər şöbəsinin elmi işçisi Tutu Məmmədova, Ekspozisiyanın izahı, qorunması və audio-video müşaiyətin təmini şöbəsinin müdiri Tomiris Babanlı, Yeni və müasir Azərbaycan ədəbiyyatının tədqiqi və təqdimi şöbəsinin kiçik elmi işçisi Munisə İsmayılova və başqalarının sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.