2018-ci il aprelin 9-da Prezident İlham Əliyev cəmiyyətin inkişafında elmin əhəmiyyətini nəzərə alaraq Azərbaycan Respublikasında “Elm günü”nün təsis edilməsi haqqında Sərəncam imzalayıb və o gündən etibarən "Elm günü" ölkəmizdə qeyd olunur. Elmi fəaliyyətlə bağlı olan hər bir müəssisə bu günü özünəməxsus şəkildə bayram kimi keçirir. 

AMEA Nizami Gəncəvi adına Milli Azərbaycan Ədəbiyyatı Muzeyi hər zaman olduğu kimi, bu il də “Elm günü”nü qeyd etməklə kifayətlənməyib, eyni zamanda, muzeyin Gənc Alim və Mütəxəssislər Şurası “Nizami ili” ilə bağlı olaraq məhz Nizami Gəncəvinin elmə verdiyi dəyəri qabardaraq “Qüvvət elmdədir başqa cür heç kəs, heç kəsə üstünlük eyləyə bilməz” adlı onlayn elmi-praktik konfrans təşkil edib.

Onlayn toplantını muzeyin Gənc alim və Mütəxəssislər Şurasının sədri Dilbər Hüseynova açaraq, "Elm günü"nün AMEA-nın yarandığı - 27 mart tarixində qeyd edilməsinin əhəmiyyətini vurğulayıb. O, tədbir iştirakçılarını əlamətdar gün münasibətilə təbrik edib, Elm gününün təsis edilməsi, Azərbaycanda elmə verilən yüksək dəyər barədə məlumat verib. 

Daha sonra şura üzvlərinin məruzələri dinlənilib. Muzeyin elmlər doktoru hazırlığı üzrə doktorantı, filologiya üzrə fəlsəfə doktoru İlahə Hacıyeva “Nizami Gəncəvinin anadilli ardıcılları”, fəlsəfə doktoru hazırlığı üzrə doktorantları - Fatimə Süleymanova “Nizami Gəncəvi və dünya mədəniyyəti Oqtay Sadıqzadə yaradıcılığında” və İnci Həşimova isə “Nizami Gəncəvi yaradıcılığı fransızdilli tədqiqatlarda” adlı məruzələrlə çıxış ediblər.

Sonda muzeyin Gənc Alim və Mütəxəssislər Şurasının sədr müavini Gülsəba Həsənova çıxışlara münasibət bildirərək, maarifləndirici məruzələrə görə təşəkkürünü bildirib. O, iştirakçıları "Elm günü" münasibətilə təbrik edib, onlara gələcək elmi fəaliyyətlərində uğurlar arzulayıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.