18 may – Beynəlxalq Muzeylər Günü bu il yenə də karantin qaydalarına uyğun olaraq müxtəlif layihə və təqdimatlarla qeyd edilir.

Beynəlxalq Muzeylər Şurası (İCOM) tərəfindən xalqlar arasında mədəni mübadilə və əməkdaşlığın inkişafına kömək məqsədilə təsis olunan bayramın builki devizi “Muzeylərin gələcəyi: dirçəliş və yeni baxış”dır.

Bu il Beynəlxalq Muzeylər Günü ölkəmizdə daha əlamətdar dövrə təsədüf edir. Belə ki, 2021-ci ildə dahi Azərbaycan şairi və mütəfəkkiri Nizami Gəncəvinin anadan olmasının 880 illiyi tamam olur. Ölkə Prezidenti İlham Əliyevin 2021-ci il 5 yanvar tarixli Sərəncamı ilə isə Azərbaycan Respublikasında 2021-ci il “Nizami Gəncəvi ili” elan olunub. 

Beynəlxalq Muzeylər Günündə AMEA-nın Nizami Gəncəvi adına Milli Azərbaycan Ədəbiyyatı Muzeyini Xaqani Şirvani adına Aran regional filialında karantin qaydalarına əməl etməklə “Açıq qapı” günü keçirilib.

Gün ərzində rayonun mədəni-maarif müəssisələrindən, idarə və təşkilatlardan xeyli sayda ziyarətçilər muzeyin qonağı olublar. Muzeyin əməkdaşları ziyarətçiləri ekspozisiya ilə tanış edib, klassik ədəbiyyatımızın görkəmli nümayəndələri haqqında geniş məlumat veriblər. Bugünkü “Açıq qapı” tədbirində iştirak edənlərin əksəriyyəti dahi şair Nizami Gəncəviyə həsr olunmuş guşəyə böyük maraq göstəriblər.

Sonda ziyarətçiləri maraqlandıran suallar cavablandırılıb, xatirə şəkilləri çəkilib.

Həmçinin X.Şirvani adına Aran filialının tədbirlərində fəal iştirakına görə bir sıra ədəbiyyat həvəskarları, yerli yazarlar və təhsil işçiləri Milli Azərbaycan Ədəbiyyatı Muzeyinin direktoru, akademik Rafael Hüseynovun imzaladığı Fəxri fərmanla təltif olunublar.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.