3 Noyabrda AMEA Nizami Gəncəvi adına Milli Azərbaycan Ədəbiyyatı Muzeyində “Nizami Gəncəvi ili” çərçivəsində növbəti elmi seminar məşğələsi keçirilib.

Orta əsrlər ərəb ədəbiyyatının tədqiqi məsələlərinə həsr olunmuş seminar məruzəsi  “Əbu Tayyib Mütənəbbi və Nizami Gəncəvi şeirində hökmdarın mədhi” mövzusuna həsr olunmuşdur. Məruzəçi – “Qədim və orta əsrlər Azərbaycan ədəbiyyatının tədqiqi və təqdimi” şöbəsinin elmi işçisi Natəvan Bağırova çıxışında X əsr ərəb şeirinin tanınmış nümayəndəsi Əbu Tayyib Mütənəbbi şəxsiyyəti və irsi haqqında geniş məlumat verərək şairin Həmdani hökmdarı Seyfəddövləyə həsr etdiyi mədhiyyələrini misilsiz poetik örnəklər adlandırıb. Bildirilib ki, şair özündən əvvəlki mədhiyyə ədəbi məktəbini davam etdirməklə yanaşı bu janra yeni üslub da gətirmişdir.

Natəvan Bağırova məruzəsində böyük Azərbaycan şairi Nizami Gəncəvinin “Xosrov və Şirin” poemasında Qızıl Arslanın, “İskəndərnamə” poemasının “Şərəfnamə” hissəsində Nüsrətəddin Əbu Bəkrin şəninə yazılmış mədhiyyələri və digər nəzm örnəklərini misal gətirərək hər iki şairin poeziyasına müqayisəli təhlil metodu ilə yanaşmışdır.

Elmi seminar məşğələsi muzeyin “Mədəni irs və mənbəşünaslıq” şöbəsinin müdiri, filologiya üzrə elmlər doktoru, professor Xatirə Bəşirli, “Ekspozisiyanın qorunması, izahı və audio müşaiyətin təmini” şöbəsinin müdiri Tomiris Babanlı, “İctimaiyyətlə əlaqələr və informasiya” şöbəsinin müdiri, filologiya üzrə fəlsəfə doktoru Nəzmiyyə Yigitoğlu, “Qədim və orta əsrlər Azərbaycan ədəbiyyatının tədqiqi və təqdimi” şöbəsinin  elmi işçisi Dilbər Hüseynova, “Ədəbi mərasimlər və ictimai nəşrlər” şöbəsinin böyük laborantı Rəhilə Sadıqova və digərlərinin sual və çıxışları ilə davam edib.