“Mədəniyyət” kanalında “Vətənim” verilişinin Rəfibəylilər nəslinin şanlı və keşməkeşli taleyinə həsr edilən ikinci buraxılışı yayımlanıb.

AMEA Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında yayımlanan verilişdə Sovet hakimiyyəti illərində 70 il boyunca Rəfibəylilər nəsli üçün bir damğaya çevrilmiş bu soyadı daşıyanlara daim şübhəli nəzərlərlə baxıldığı bildirilib. Qeyd edilib ki, bu soyadın nümayəndələri, həbslərə, sürgünlərə, ölümlərə, mühacirətlərə məruz qalsa da, nəslin üzvləri hətta həmin rejimin hakimiyyəti dövründə də parlamağı bacarıblar, ucalıqlarını hər zaman hifz ediblər.

Onların Azərbaycanda 20-yə yaxın soyadla yaşadıqlarını deyən akademik R.Hüseynov Rəfibəylilərin bu yolla təqiblərə daha az məruz qaldıqlarını bildirib. Əlavə edib ki, Türkiyədə mühacirətdə olan nümayəndələr 3 soyadla fəaliyyət göstərirdilər.

Akademikin sözlərinə görə, hansı ölkədə yaşamasından asılı olmayaraq onların hər birinin içərisində hər zaman Rəfibəyli nəbzi döyünür və onlar nəslin ən-ənələrini davam etdirirdilər. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.