AMEA Nizami Gəncəvi adına Milli Azərbaycan Ədəbiyyatı Muzeyində bu qurumun “Komparativistika və bədii tərcümə” şöbəsinin müdiri, filologiya elmləri doktoru, professor Şəfəq Əlibəylinin “Qafqaz Media” İctimai Birliyi tərəfindən “Nizami Gəncəvi” medalı ilə təltifolunma mərasimi baş tutub.

Mərasimi fəlsəfə üzrə fəlsəfə doktoru Kəmalə Nuriyeva giriş sözü ilə açaraq ölkə prezidenti İlham Əliyevin Sərəncamı ilə 2021-ci ilin “Nizami Gəncəvi ili” elan olunması və bununla əlaqədar ölkə miqyasında çoxsaylı tədbirlərin keçirilməsi haqqında məlumat verib. Bildirilib ki, AMEA Nizami Gəncəvi adına Milli Azərbaycan Ədəbiyyatı Muzeyində də dahi mütəfəkkirin 880 illik yubileyinə həsr olunmuş beynəlxalq elmi konfrans 25-26 noyabr tarixində uğurla keçirilmişdir. Kəmalə Nuriyeva qeyd edib ki, muzeyin “Komparativistika və bədii tərcümə” şöbəsinin müdiri, filologiya elmləri doktoru, professor Şəfəq Əlibəylinin Vətən müharibəsi şəhidlərinin əziz xatirəsinə həsr etdiyi “Nizami “Xəmsə”sində akustik obrazlar (linqvopoetik təhlil)” adlı yeni kitabı da dahi şair və filosofun irsinin öyrənilməsinə xidmət edir.

Sonra “Qafqaz Media” İctimai Birliyinin sədr müavini Sahilə Mirzəqızı çıxış edərək 2004-cü ildən fəaliyyət göstərən qurumun milli mətbuatın inkişafına yönəlik mühüm layihələri, təsis etdiyi “Heydər zirvəsi”, “İlhamlı Azərbaycan”, “Xarı bülbül” adlı təltifləri haqqında məlumat verib. O, qeyd edib ki,  İctimai Birlik 2021-ci - “Nizami Gəncəvi ili” çərçivəsində dahi Azərbaycan şairinin adını əbədiləşdirən  “Nizami Gəncəvi” medalının da təsisçisidir. Bildirilib ki, Nizami muzeyinin əməkdaşı, professor Şəfəq Əlibəylinin “Nizami “Xəmsə”sində akustik obrazlar (linqvopoetik təhlil)” adlı yeni monoqrafiyası və Nizami Gəncəvi irsinin öyrənilməsi istiqamətindəki müxtəlif əsərləri “Nizami Gəncəvi ili”nə dəyərli elmi töhfələrdəndir. 

Sonra Sahilə Mirzəqızı “Qafqaz Media” İctimai Birliyi adından filologiya elmləri doktoru, professor Şəfəq Əlibəylini elmdə göstərdiyi xidmətlərə və “Nizami Gəncəvi ili”nə ərməğan olaraq yaratdığı “Nizami “Xəmsə”sində akustik obrazlar (linqvopoetik təhlil)” kitabına görə “Nizami Gəncəvi” medalı, “Xarı bülbül”, “İki devlet, bir millet Azerbeycan ve Türkiye”  diplomları ilə təltif edib.

Daha sonra tədbirdə Nizami muzeyinin əməkdaşları filologiya üzrə fəlsəfə doktoru Natavan Mustafayeva, Solmaz Azadova, şöbə müdiri Tomiris Babanlı, filologiya üzrə fəlsəfə doktoru Sevinc Heydərova və digərləri də çıxış edərək professor Şəfəq Əlibəylini təbrik etmiş, haqqında ürək sözləri və arzularını dilə gətirmişlər.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.