AMEA Nizami Gəncəvi adına Milli Azərbaycan Ədəbiyyatı Muzeyinin Sergey Yesenin adına Azərbaycan-Rusiya Ədəbi Əlaqələr Mərkəzində Rusiya Yazıçılar Birliyinin sədr müavini, “Veçe” nəşriyyatının baş redaktoru, Əməkdar mədəniyyət işçisi Sergey Dmitriyev ilə görüş keçirilib.

Tədbiri Azərbaycan-Rusiya Ədəbi Əlaqələr Mərkəzinin müdiri, filologiya üzrə fəlsəfə doktoru Natavan Mustafayeva açaraq hər iki ölkə arasında ədəbi-mədəni əlaqələrin daha da inkişaf etdiyini söyləyib. O, Azərbaycan–Rusiya Ədəbi Əlaqələr Mərkəzinin iki ölkə üçün dostluq rəmzinə çevrildiyini vurğulayıb, S.Yeseninin yaradıcılığı ilə bağlı maraqlı məqamlardan söz açıb.

Sonra Sergey Dmitriyev “Yeseninin müəmmalı ölümü” mövzusunda məruzə ilə çıxış edib. O, S.Yeseninin intihar etməsi faktının yanlış olduğunu və uzun illər apardığı axtarışlar zamanı üzə çıxardığı bir çox arqumentlərə söykənərək şairin həyatına qəsd edilməsini sübuta yetirməyə çalışdığını söyləyib, iştirakçıların suallarını cavablandırıb.

Muzeyin ekspozisiyası ilə tanışlıqdan sonra qonaq müəllifi olduğu kitablarını Mərkəzə hədiyyə edib, rəy kitabına ürək sözlərini yazıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.