Tacikistan Milli Elmlər Akademiyasının professoru, tanınmış şərqşünas alim Şadiməhəmməd Sufizadə AMEA Nizami Gəncəvi adına Milli Azərbaycan Ədəbiyyatı Muzeyinin qonağı olub.

Muzeyin zəngin ekspozisiya zalları ilə tanış olan alim Azərbaycanın multikulturalizmə dəyər verən ölkə olduğunu deyib. O, bu söz, sənət məbədini əvvəllər də ziyarət etdiyini, burada sərgilənən qədim əlyazma və daşbasma kitablarını hər gəlişində maraqla izlədiyini bildirb.

Ziyarətinin sonunda şərqşünas alim Nizami Muzeyi haqqında təəssüratlarını muzeyin rəy kitabında qələmə alıb:

“Əgər mən bu gün Nizami muzeyini ziyarət etməsəydim  bu gözəl ölkəyə səfərim yəqin ki, natamam olardı.

Belə bənzərsiz intellektual məkanı yaratdığına görə muzeyin baş direktoru, akademik Rafael Hüseynova öz sonsuz minnətdarlığımı bildirirəm. Muzeyin yüksək ixtisaslı bələdçiləri sayəsində qısa vaxt ərzində Azərbaycan ədəbiyyatı və mədəniyyətinin keçdiyi tarixi yolu izləyə bildim.

Sizə minnətdarlığımı bildirirəm!

Nizami muzeyinin bütün kollektivinə, o cümlədən, Azərbaycan xalqına nailiyyətlər və çiçəklənmə arzulayıram!"