Yanvarın 23-də Azərbaycan Radiosunda “Axşam görüşləri” proqramının XX əsr dünya ədəbiyyatının böyük şairlərindən olan Nazim Hikmətə həsr edilən ilk verilişi yayımlanıb.

AMEA-nın Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında yayımlanan verilişdə böyük türk və dünya şairi Nazim Hikmətin ömür yoluna nəzər salınıb, onun bədii yaradıcılığı haqqında ətraflı məlumat verilib.

Bildirilib ki, şairin ana dilində yazdığı şeirlərini oxuyan hər kəs Nazim Hikmətin dahiliyini etiraf etmiş, onun dünyanın müxtəlif dillərinə tərcümə edilmiş şeirlərini oxuyanlar isə heyranlıqlarını ifadə etmişlər.

Akademik R.Hüseynov qeyd edib ki, Nazim Hikmət uzun olmayan ömrünün 15 ilini həbsxanalarda keçirmiş, qürbət ölkələrdə yaşamış, ürəyi hər zaman Vətən həsrəti ilə döyünmüş və Moskvada torpağa tapşırılmışdır.

“Nazim Hikmət həyatının bütün ayrılıqlarına, ağrı-acılarına baxmayaraq xoşbəxt idi, çünki onun daxilində şeir boyda dünya var idi”, - deyə qeyd edən akademik əlavə edib ki, insanlardan fərqli olaraq, onun qələmi heç zaman böyük şairə xəyanət etməmişdir.

Akademik R.Hüseynov N.Hikmət haqıqnda ən məşhur kitablardan biri olan “Bu dünyadan bir Nazim keçdi” əsərindən bəhs edib. Qeyd edib ki, 40 il ərzində şeirlər yazmış böyük şairin bu əsərlərində həm özünün, həm də XX əsrin tərcümeyi-halı əks olunub.

“O şeirlərin ömrü sozün ömrü qədər olacaq. Həmin şeirlərlə birgə Nazim Hikmət də hər zaman diri olacaq, bu dünyada əbədi qalacaq”, - deyə akademik R.Hüseynov vurğulayıb. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.