Fevralın 20-də Azərbaycan Radiosunda FM 105 tezliyində “Axşam görüşləri” proqramının növbəti buraxılışı yayımlanıb.

AMEA-nın Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında yayımlanan verilişdə görkəmli yazıçı Əlfi Qasımovun bədii yaradıcılığına nəzər salınıb.

Akademik R.Hüseynov vaxtilə çox oxunan, indi də unudulmayan əsərlərin müəlifi olan Ə.Qasımovun qələmindən çıxmış hər bir əsəri ilə oxuculara böyük işıq bağışladığını, ümid verdiyini bildirib. Qeyd edib ki, bütün varlığı xeyirxahlıqla yoğrulmuş Ə.Qasımov bütün ömrü boyu tutduğu hər vəzifədə yalnız ona tapşırılan işi yerinə yetirməklə kifayətlənməmiş, bu işdən həm də yaxşılıq etmək yollarını tapmaq üçün yararlanmışdır. Akademikin sözlərinə görə, onun etdiyi yaxşılıqların xoş xatirəsini qəlbində daşıyan insanlar bu gün bütün Azərbaycanı əhatə edir.

R.Hüseynov yazıçı Ə.Qasımovun böyük ədəbiyyata jurnalistikadan, publisistikadan gəldiyini və özü ilə bədii sözümüzə cazibədar jurnalist surətini gətirən ilklərdən biri olduğunu diqqətə çatdırıb.

O, Ə.Qasımovun həyatda olmadığı bir zamanda şair dostu Fikrət Sadığın yazıçı haqqında səsləndirdiyi xatirələrindən bəhs edib. Bildirib ki, 58 il ömür yaşamış Əlfi Qasımov artıq 37 ildir ki, həyatda olmasa da, onun adı, əsərləri, xeyirxahlığı haqqında minnətdar xatirələr yaşayır və yazıçını yaşadır.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.