Fevralın 22-də AMEA-nın Humanitar Elmlər Bölməsinin (HEB) Elmi şurasının onlayn iclası keçirilib.

İclası AMEA-nın vitse-prezidenti, Humanitar Elmlər Bölməsinin Elmi şurasının sədri, akademik İsa Həbibbəyli açaraq xalqımızın zəngin milli adət-ənənələrindən danışıb, Su çərşənbəsi münasibətilə xalqımızı təbrik edib.

Sonra Folklor İnstitutunun baş direktoru, akademik Muxtar İmanov Su çərşənbəsinin etimologiyası haqqında ətraflı məlumat verib, suyun müqəddəs mahiyyətini bir daha diqqətə çatdırıb.

Daha sonra Elmi şuranın sədri, akademik İsa Həbibbəyli gündəlikdə duran elmi-təşkilati məsələlərlə iclas iştirakçılarını tanış edib.

2022-ci ilin Azərbaycan Respublikasında “Şuşa İli” elan edilməsi ilə bağlı HEB-in elmi müəssisələrinin fəaliyyət planı müzakirə olunub, qarşıda duran vəzifələr diqqətə çatdırılıb.

Görkəmli Azərbaycan yazıçısı, şair, dramaturq, publisist və ictimai xadim Məmməd Səid Ordubadinin anadan olmasının 150 illiyi ilə əladəqar HEB-in Tədbirlər planı təsdiq edilib, müəssisə rəhbərlərinə müvafiq tapşırıqlar verilib.

Həmçinin XX əsr Azərbaycan mədəniyyəti tarixində ən unudulmaz adlardan biri, teatr və mətbuat tariximizin yorulmaz tədqiqatçısı, tanınmış mətnşünas Qulam Məmmədlinin anadan olmasının 125 illiyinin qeyd edilməsi ilə bağlı HEB-in Tədbirlər planının hazırlanmasına dair təkliflər irəli sürülüb.

Akademik İsa Həbibbəyli Nizami Gəncəvi adına Ədəbiyyat İnstitutu tərəfindən hazırlanmış oncildlik fundamental “Azərbaycan ədəbiyyatı tarixi”nin V cildinin nəşr edildiyini, VI cildin nəşrə hazırlandığını qeyd edib.

İclasda Nəsimi adına Dilçilik İnstitutunun Elmi şurasının tərkibində dəyişiklik edilməsi, Memarlıq və İncəsənət İnstitutunun Gənc Alim və Mütəxəssislər Şurasının sədrinin təsdiq edilməsi haqqında müvafiq qərarlar qəbul olunub.

Eyni zamanda, AMEA-nın müxbir üzvü Ənvər Qasımzadənin 110 illiyinə dair Elmi sessiyanın keçirilməsi, dahi memarın həyat və fəaliyyətinin mətbuatda işıqlandırılması haqqında Memarlıq və İncəsənət İnstitutuna tapşırıqlar verilib. AMEA-nın müxbir üzvü Cəfər Qiyasinin isə 80 illik yubileyi ilə əlaqədar AMEA-nın Rəyasət Heyəti qarşısında vəsatət qaldırılıb.

Elmi şuranın iclasında bir sıra kadr məsələlərinə də baxılıb.

İclasın sonunda HEB-in elmi müəssisələrinin gələcək fəaliyyəti və qarşıda duran vəzifələrə dair fikir mübadiləsi aparılıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.