Avropa Şurası Parlament Assambleyasının Mədəniyyət, elm, təhsil və media komitəsinin iclaslarında iştirak etmək üçün Romada səfərdə olan Milli Məclisin deputatı, Dünya Azərbaycanlılarının Əlaqələndirmə Şurasının üzvü, AMEA Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynov İtaliyadakı həmvətənlərimizlə görüşüb.

O, İtaliyada daimi yaşayan və təhsil alan azərbaycanlıların bir qrupu ilə səmimi fikir mübadiləsi aparıb. Alim bildirib ki, dünya boyu səpələnmiş soydaşlarımızın arasında əlaqələr müstəqillik dönəmində, xüsusilə son 20 ildə artıb, xarici ölkələrdəki soydaşlarımızın təşkilatlanması səmtində əhəmiyyətli uğurlar qazanılıb.

Akademik Rafael Hüseynov bu gün müasir dünyada səsi eşidilən, imzası tanınan, nüfuzu artan, tədricən daha artıq birliyə nail olan Azərbaycan diasporunun mahiyyət etibarilə ümummilli lider Heydər Əliyevin gərgin fəaliyyətləri ilə bağlı olduğunu vurğulayıb: “Tale elə gətirdi ki, unudulmaz Heydər Əliyevin Böyük Qayıdışından, müstəqil Azərbaycan Respublikasına rəhbərlik etməyə başladığı ilk illərdən mənə o böyük şəxsiyyəti bir çox xarici səfərlərində müşayiət etmək nəsib oldu. Canlı şahidəm ki, Ulu Öndər həmin səfərlər əsnasında işləri nə qədər çox, vaxtı nə qədər az olsa da, həmişə gəldiyi ölkələrdə yaşayan və Azərbaycandan olan insanları toplayır, onlarla müfəssəl söhbətlər aparır, onlara sahib çıxmağa hər an hazır olan, onların da iftixar etməli olduqları doğma və azad dövlətlərinin varlığı həqiqətini dilə gətirirdi. Müdrik millət və dövlət rəhbəri öz qüdrətli cazibəsi ilə xaricdəki azərbaycanlıların müxtəlif nəsillərini bir-birlərinə yaxınlaşdırır, onları ortaq Vətən ideyası ətrafında daha möhkəm qovuşmağa yönəldirdi. Bütün bu səyləri ilə əslində Ulu Öndər müasir və güclü Azərbaycan diasporunun təməlini qoyurdu. Çox keçmədən o, xaricdə yaşayan soydaşlarımızın Vətəndəki başlıca ünvanı olacaq ayrıca dövlət komitəsinin yaranması haqda da Sərəncam imzaladı, tarixdə ilk dəfə Bakıda dünya azərbaycanlılarının qurultayını da keçirdi”.

İtaliyada yaşayan azərbaycanlıların ölkənin ictimai-siyasi, mədəni həyatında yaxından iştirak etməsindən məmnunluğunu ifadə edən R.Hüseynov aprel günlərində qalib Vətənimizin azad Şuşada təşkil etdiyi dünya azərbaycanlılarının Zəfər Qurultayından da bəhs edib. O, həmin tədbirdə Müzəffər Ali Baş Komandan, Prezident İlham Əliyevin 60-dan artıq xarici ölkədən gəlmiş həmvətənimiz qarşısında qürurla bəyan etdiyi sözləri yada salıb: “Zəfər adı xalqımıza çox yaraşır. Siz buraya Zəfər yolu ilə gəlmisiniz, qurultayın adı Zəfər Qurultayıdır. Bundan sonra Azərbaycan xalqı müzəffər xalq kimi əbədi yaşayacaq, bundan sonra bizim dövlətimiz qalib dövlət kimi yaşayacaq. Bu, böyük xoşbəxtlikdir - hamımız üçün, Azərbaycanda yaşayanlar, Azərbaycan vətəndaşları üçün, xaricdə yaşayan azərbaycanlılar üçün”.

Daha sonra akademik R.Hüseynov İtaliyada yaşayıb-işləyən soydaşlarımızı maraqlandıran bir sıra sualları cavablandırıb, Diasporla İş üzrə Dövlət Komitəsinin xətti ilə gələcəkdə də bu qəbil təmaslar və görüşlərin davam etdirilməsinin vacibliyini vurğulayıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.