AMEA Nizami Gəncəvi adına Milli Azərbaycan Ədəbiyyatı Muzeyinin Ekspozisiyanın izahı, qorunması və audio müşaiyətin təmini şöbəsinin müdiri, Əməkdar mədəniyyət işçisi Tomiris Babanlının müəllifliyi ilə “Buzovna ensiklopediyası. Vətənnamə” adlı kitab işıq üzü görüb.

Buzovna qəsəbəsinin Ruhulla Axundov adına Mədəniyyət Evində sözügedən kitabın təqdimat mərasimi keçirilib.

Tədbir Azərbaycan Respublikasının Dövlət Himninin səsləndirilməsi ilə başlayıb.

Daha sonra Azərbaycanın ərazi bütövlüyü yolunda canlarını qurban vermiş Vətən müharibəsi şəhidlərinin əziz xatirəsi bir dəqiqəlik sükutla yad edilib.

Təqdimat mərasimində Qafqaz Müsəlmanları İdarəsinin Xəzər rayonu üzrə qazısı, Buzovna Cümə məscidinin axundu, Buzovna Dini İcmasının sədri, tədqiqatçı, yazıçı Axund Hacı Soltan Əlizadə çıxış edərək Rəhimağa İmaməliyevin fədakar əməyindən, onun 1992-ci ildə Buzovnada təsis etdiyi ilk nəşriyyat olan “Boz oğuz” ailə nəşriyyatının fəaliyyətindən söhbət açıb.

Bildirilib ki, uzun illər boyu gərgin və ardıcıl axtarışların nəticəsi kimi ərsəyə gəlmiş ensiklopediyanın materialları hələ keçən əsrin 70-ci illərindən ziyalı, ensiklopedist alim Rəhimağa İmaməliyev tərəfindən toplanılmağa başlanmışdır. Lakin alimin səhhətinin pozulması və vaxtsız vəfatı bu mühüm qaynağın hazırlanıb başa çatmasına imkan verməmişdir. 2020-ci ildən Rəhimağa İmaməliyevin həyat yoldaşı Validə İmaməliyeva və qızı Tomiris Babanlının yorulmaz əməkləri ilə “Buzovna ensiklopediyası. Vətənnamə” kitabı hazırlanaraq 2022-ci ildə “Təhsil” nəşriyyatında işıq üzü görmüşdür.

Qeyd olunub ki, bu monumental tarixi qaynaq beş fəsildən ibarətdir. Kitabın səhifələrində Buzovna və Zuğulbanın arealı, təbiəti, tarixi yer, məhəllə və abidələrinin adları ilə yanaşı, tanınmış şəxsiyyətləri haqqında da geniş məlumat verilir.

Diqqətə çatdırılıb ki, nəşrin tərtibçiləri Validə İmaməliyeva və Tomiris Babanlı hərb, savaş tariximizdə silinməz izlər qoymuş buzovnalı qəhrəmanlar haqqında ensiklopediyada ətraflı məlumat verərək, “1939-1945-ci illər Böyük Vətən müharibəsində şəhid olmuş buzovnalı döyüşçülərin təqribi siyahısı”, “Qarabağ müharibəsi şəhidləri” başlıqları altında Vətən igidlərinin adını və xatirəsini əbədiləşdiriblər.

Tədbirdə kitabın tərtibçilərindən biri olan Tomiris Babanlı çıxış edərək nəşrin ərsəyə gəlməsindən danışıb, ona dəstək olan hər kəsə minnətdarlığını bildirib.

Daha sonra akademik Ziyad Səmədzadə, şair Arif Buzovnalı “Boz oğuz” nəşriyyatının çap etdirdiyi kitablardan bəhs edib, ensiklopediyanın gələcək nəsillər üçün tədqiqat mənbəyi kimi baza rolunu oynadığını vurğulayıblar.

Yazıçı Kənan Hacı isə çıxışında Rəhimağa İmaməliyevi öz ustadı kimi anaraq, yaradıcılıq yoluna qədəm qoymasında naşirin rolundan bəhs edib.

Mərasimdə 125 nömrəli məktəbin direktoru Zeynəb Əliyeva, Əməkdar müəllim, yazıçı-jurnalist Tamilla Muradova, AMEA Memarlıq və İncəsənət İnstitutunun elmi işçisi Elçin Əliyev İmaməliyevlər ailəsinin fədakar əməyini yüksək qiymətləndirib, bu ensiklopediyanın Buzovna kəndinin tarixinin, mədəniyyətinin və görkəmli şəxsiyyətlərinin həyatının öyrənilməsində mühüm elmi mənbə olduğunu qeyd ediblər.

Təqdimat mərasimində, həmçinin tanınmış həkim, ictimai xadim Fəxrəddin Cavadovun oğlu, Azərbaycanın ictimai və dövlət xadimi, diplomat Gülmirzə Cavadov atasının Rəhimağa müəllimlə bağlı xatirələrindən danışıb, bir çox ziyalılar kimi onun da “Boz oğuz” nəşriyyatının işini dəstəkləməsi barədə çıxış edib.

Tədbirdə II Qarabağ müharibəsində şəhidi Vüsal İsmayılzadənin anası Lalə xanım və şəhid Ağəmi Heybətovun bacısı Kəmalə xanım bütün şəhid ailələri adından tərtibçilərə minnətdarlıqlarını bildirib, şəhidlərimizlə qürur duyduqlarını qeyd ediblər.

Sonda Azərbaycan Dövlət Mədəniyyət və İncəsənət Universitetinin magistrantı Fəridə Əliyevanın Buzovna haqqında çəkdiyi “Sahildəki inci” filminin nümayişi olub, Buzovnanın xalq çalğı alətləri ansamblının ifasında mahnılar, qəsəbə məktəblilərinin ifasında Buzovna haqqında şeirlər səsləndirilib.

“Buzovna Ensiklopediyası. Vətənnamə” ensiklopedik-məlumat kitabının redaksiya heyətinin sədri, Əməkdar mədəniyyət işçisi, Həsən bəy Zərdabi mükafatı laureatı, AMEA Azərbaycan Milli Ensiklopediyası Elmi Mərkəzinin redaksiya müdirinin müavini Validə İmaməliyeva kitabın işıq üzü görməsində əməyi keçənlərə və tədbir iştirakçılarına təşəkkürünü bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.