Pakistanın Lahor şəhərindən ölkəmizə tədqiqat məqsədilə gəlmiş bir qrup alim 5 iyul tarixində Nizami muzeyini ziyarət edib. 5-6 iyul tarixlərində Muzeydə keçirilən Xurşidbanu Natəvanın anadan olmasının 190 illik yubileyinə həsr edilmiş beynəlxalq konfransa da dinləyici qismində qatılmış tədqiqatçılar daha sonra muzeyin ekspozisiyası ilə tanış olublar. 

 Lahor Dövlət Universitetinin Urdu dili kafedrasının dosenti Almas Khanum və Lahor Dövlət Qadın Tədqiqatçılar Kollecinin Kitabxanaşünaslıq kafedrasının müdiri, dosent Faiza Bəşirli muzeyin ekspozisiyasiya zallarını gəzərkən Beynəlxalq əlaqələr və dünya muzeyləri şöbəsinin müdiri, kulturologiya üzrə fəlsəfə doktoru Nailə Əliyevanın apardığı izahatı da marala dinləyiblər.

AMEA Nizami Gəncəvi adına Ədəbiyyat İnstitutunda postdoktoral tədqiqat işləri aparan alimlər Muzeyin ekspozisiyasında nümayiş etdirilən xalçalar, miniatürlər, orta əsrlərə aid kaşılar, xatirə əşyaları və digər eksponatlara heyran qalıblar. Azərbaycan ədəbiyyatının bütün dövrlərində yazıb-yaradan ədiblərin əsərlərində əksini tapan dəyərlər filoloq-tədqiqatçıların böyük marağına səbəb olub. Muzeyin rəy kitabına düşüncələrini yazan tədqiqatçılar burada görüb eşitdiklərinin də onların araşdırmaları üçün çox faydalı olacağını qeyd ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.