5-7 sentyabrda Türkiyə Cümhuriyyəti Aydın Adnan Menderes Universitetinin təşkilatçılığı ilə keçirilən beynəlxalq konfransda Nizami Gəncəvi adına Milli Azərbaycan Ədəbiyyatı Muzeyinin əməkdaşları da iştirak ediblər.

Bu ilki “XVI Uluslararası Türk Sanatı, Tarihi ve Folkloru. Sanat Etkinlikləri” konqresi Türkiyə Qazi Universitetinin professoru, türkoloq-alim Necati Dəmirə həsr olunmuşdur. Türk dünyası tarixi, ədəbiyyat və mədəniyyəti mövzuları üzrə səkkiz bölmədə keçirilən konfransda Türkmənistan, Özbəkistan, Azərbaycan, İran, Ukrayna, Rusiya, Albaniya və digər ölkələrin elm adamları iştirak ediblər.

Nizami Gəncəvi adına Milli Azərbaycan Ədəbiyyatı Muzeyinin əməkdaşlarının məruzələri və slayd nümayişi də onlayn rejimdə keçirilən konfransda maraqla dinlənilib. Konfransın ilk günündə  filologiya üzrə fəlsəfə doktoru Gülnar Əqiq XIX əsrdə Azərbaycanın mədəniyyət paytaxtı Şuşada yaşamış Bəhmən Mirzə Qacarın ədəbi fəaliyyəti mövzusunda məruzə ilə çıxış edib.

Muzeyinin əməkdaşı -  “Ekspozisiyanın qorunması, izahı və audio müşaiyətin təmini” şöbəsinin böyük elmi işçisi, fil.ü.f.d. Sevinc Heydərova isə “Ədəbiyyatımızın “Yarım əsrlik yolu”nun izi ilə” (Ayaz Vəfalının “Yarım əsrlik yol” kitabı əsasında) mövzusunda ədəbiyyatşünas, tənqidçi Ayaz Vəfalının  85 illik yubileyi ilə bağlı həyat və yaradıcılığını əhatə edən məruzə ilə çıxış etmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.