Kürdəmir Rayon Mərkəzi Xəstəxanasında N.Gəncəvi adına Milli Azərbaycan Ədəbiyyatı Muzeyinin Aran Regional filialının müdiri, filologiya üzrə fəlsəfə doktoru, yazıçı-publisist Yaqut Bahadurqızının 44 günlük Vətən  müharibəsinində tarix yazan, Vətən uğrunda qəhrəmancasına döyüşərək canını fəda edən 39 kürdəmirli şəhiddən bəhs edən "Ölümü ömür seçənlər" kitabının təqdimatı olub.

Şəhid ailələrinin və səhiyyə işçilərinin iştirak etdiyi tədbir Dövlət Himninin səsləndirilməsi ilə başlayıb.

Sonra ölkəmizin ərazi bütövlüyü uğrunda şəhidlik zirvəsinə ucalan qəhrəman oğullarımızın xatirəsi bir dəqiqəlik sükutla yad edilib. 

Təqdimat mərasimində çıxış edən Kürdəmir rayon Mərkəzi xəstəxanasının baş həkimi Tarix İslamov ölkə Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında 44 gün ərzində əldə olunan möhtəşəm Qələbənin müstəqillik tariximizin ən böyük zəfəri olduğunu qeyd edib.

Sonra çıxış edən şəhid MAXE Adəm Əliyevin anası Akifə Ağayeva, şəhid gizir Cəmil Həşimlinin anası Simuzər Bağıyeva, Şəhid MAXE Fərid Məmmədovun anası Kifayət Məmmədova, Şəhid Əli Məmmədovun anası Nina Məmmədova qəhrəman övladları ilə bağlı kövrək xatirələrini bölüşüblər. Şəhid anaları kürdəmirli şəhidlər haqqında yazılan bu kitabdan təskinlik aldıqlarını vurğulayıblar.

Mərkəzi rayon Xəstəxanası Səhiyyə İşçiləri Həmkarlar təşkilatının sədri Rasim Əzizov çıxış edərək Kürdəmir şəhidləri haqqında yazılan “Ölümü ömür seçənlər” kitabının onların xatirələrinin əbədiləşdirilməsi məqsədilə atılan təqdirəlayiq addım olduğunu deyib. O, gələcək nəsilərə hərbi vətənpərvərlik ruhunun aşılanması baxımından nəşrin əhəmiyyətini qeyd edib və müəllifə qısa zaman ərzində belə dəyərli kitabı ərsəyə gətirdiyinə görə şəhid ailələri adından minnətdarlıqlarını bildirib.

Təqdimat mərasiminin sonunda kitabının müəllifi Yaqut Bahadurqızı 44 günlük Vətən müharibəsində həkimlərimizin göstərdiyi fədakarlıqdan bəhs edib. Müəllif onun əməyinə göstərilən diqqətdən məmnunluğunu ifadə edərək tədbirin iştirakçılarına təşəkkür edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.