Azərbaycanda fəaliyyət göstərən “Русский Дом в Баку” (Россотрудничество)nun təşkilatçılığı ilə böyük rus şairi Sergey  Yeseninin anadan olmasının 127-ci ildönümü münasibətilə ədəbi-bədii gecə keçirilib. Görkəmli incəsənət xadimləri, Azərbaycan ziyalıları, S.Yesenin poeziyasının pərəstişkarları ölməz şairin sənətinin işığına toplaşmışdılar. Gecənin bədii hissəsini “Gunay” uşaq teatrının təqdimatında Sergey Yeseninin şeirləri əsasında qurulmuş kompozisiya təşkil etmişdir. Daha sonra Əməkdar mədəniyyət xadimi Rafiq Qaşanlının ifasında şairin şeirləri səslənib. Rusiya Yazıçılar birliyinin üzvü, şair Eldar Əhədov S.Yeseninə ithaf etdiyi şeirlərini oxuyub, Xalq artisti Oqtay Mirqasımov dahi rus şairi haqqında öz ürək sözlərini dilə gətirib.

Nizami Gəncəvi adına Milli Azərbaycan Ədəbiyyatı Muzeyinin Sergey Yesenin adına Rusiya-Azərbaycan ədəbi əlaqələr mərkəzinin müdiri, filologiya üzrə fəlsəfə doktoru Natəvan Mustafayeva da çıxış edərək mərkəzin fəaliyyəti və mərkəz nəzdində olan Sergey Yeseninin xatirə muzeyi haqqında tədbir iştirakçılarına məlumat verib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.