Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialında “Şuşa, sən azadsan!” adlı elmi-ədəbi tədbir keçirilib.

“Şuşa İli” çərçivəsində təşkil olunan tədbirdə əvvəlcə Vətən müharibəsi şəhidlərinin əziz xatirəsi bir dəqiqəlik sükutla yad olunub.

Daha sonra Azərbaycan Respublikasının Dövlət Himni səsləndirilib.

Tədbiri giriş sözü ilə açan Muzeyin Aran filialının müdiri, yazıçı-publisist, filologiya üzrə fəlsəfə doktoru Yaqut Bahadurqızı Azərbaycanın mədəniyyət paytaxtı, Qarabağın tacı olan Şuşanın 30 ilə yaxın müddətdə düşmən tapdağından azad edilməsinin tarixi Qələbəmizin simvolu olduğunu bildirib.

Sonra “Şuşa - mədəniyyət paytaxtı” adlı sənədli film nümayiş olunub.

M.Ə.Rəsulzadə adına Kürdəmir şəhər 2 saylı tam orta məktəb-liseyin tarix müəllimi Ülviyyə Şükürova “Şuşa işğaldandan öncə, işğal dövrü və bu gün” mövzusunda məruzə ilə çıxış edib. O, Şuşa şəhərinin tarixindən, şəhəri qədim və orta əsrlər memarlığının ən gözəl ənənələrinə uyğun inşa etdirən Pənahəli xan və İbrahimxəlil xanın fəaliyyətindən, XVIII- XIX əsrlərə aid olan abidə və tikililərindən bəhs edib.

“Şuşanı mədəniyyətimizin beşiyi edən şəxsiyyətlər” mövzusunda məruzə ilə çıxış edən Yaqut Bahadurqızı bildirib ki, Şuşa Azərbaycanın qədim tarixə malik olan şəhər mədəniyyətinin nadir və təkrarsız incilərindən biridir. Məruzəçi mədəniyyətimizin inkişafına böyük töhfələr verən Xurşidbanu Natəvan, Gövhər ağa, Cəfərqulu xan, Uğurlu bəy, Fərzəli bəy, Nəcəfqulu ağa, Hacı qulu, Səfibəy kimi tanınmış şəxsiyyətlərin bu bölgənin və şəhərin mədəniyyətinin inkişafı üçün böyük işlər gördüyünü qeyd edib.

Yaqut Bahadurqızı XIX əsrdə Şuşada yaşamış 95 şair, 22 musiqişünas, 38 xanəndə, 19 xəttat, 16 rəssam, 12 katib, 5 astronom, 18 memar, 16 həkim, 42-dək müəllim və başqa şəxsiyyətlərin şəhərin mədəni inkişafında mühüm rol oynadığını vurğulayıb.

Tədbirin bədii hissəsində Kürdəmir şəhər 3 saylı tam orta məktəbin şagirdləri Aişə Əsgərzadə, Rüfanə Məmmədova, rayonun Atakişili kənd tam orta məktəbinin şagirdləri İlahə Xəlilova, Məlahət Xaspoladova, Səbinə Məmmədova və Qacar Sadıqov adına Mollakənd tam-orta məktəbinin şagirdi Behbud Alıyev Şuşaya həsr olunmuş şeirləri ifa ediblər. Həmçinin tanınmış xanəndə Səfalı Əliyev “Şuşanın dağları” mahnısını ifa edib.

Tədbirdə şəhid anası Simuzər Bağıyeva, Azərbaycan Yazıçılar Birliyinin üzvü yazıçı-publisist Əlisəfa Azayev, Kürdəmir rayon İH Başçısının müavini Vəsilə Əsgərli çıxış edərək mədəniyyət və incəsənətimizin beşiyi olan Şuşanın işğaldan azad olmasını Azərbaycan tarixinin şanlı səhifəsi olmasından, Ali Baş Komandanımız İlham Əliyevin rəhbərliyi ilə bizi zəfərə qovuşduran şəhid oğullarımızın, qazilərimizin, rəşadətli ordumuzun göstərdiyi hünərdən bəhs ediblər.

Sonda Xan Şuşinskinin ifasında “Qarabağ şikəstəsi”nin lent yazısı səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.