Oktyabr ayının 13-də Rusiya yazıçılar birliyinin və Azərbaycan yazıçılar birliyinin fəxri üzvü, yazıçı və şair Eldar Əhədov Nizami Gəncəvi adına Milli Azərbaycan Ədəbiyyatı Muzeyini ziyarət edib.
Görkəmli ədəbiyyat xadimlərinin həyat və yaradıcılığı barədə məlumatları qonağın diqqətə çatdıran Zarema İbrahimova, “Dörd fəsil” xalçası, III-VII əsrlərə aid Qrifon, “Kitabi-Dədə Qorqud” dastanından parçaları əks etdirən xəttatlıq nümunələri, Xaqani Şirvani və Nizami Gəncəvi “Divan”larının daşbasma üsulu ilə çap edilmiş nüsxələri, İmadəddin Nəsiminin qəzəllərinə bəstələnmiş not vərəqləri, Pənahəli xana məxsus “Gülləbatmaz” köynək, XIX-XX əsrlərdə yaşayıb-yaratmış şair və yazıçılarımızın şəxsi əşyaları və s. qiymətli eksponatlarla da tanış edib.
Muzeyin ekspozisiyasında nümayiş etdirilən əlyazmaları, klassik əsərlərə toxunmuş süjetli xalçaları, vitrinlərdə mühafizə edilən şair və yazıçılarımızın müəllifi olduğu bədii əsərlərin müxtəlif nəşrlərini və onlar barəsində olan tədqiqatları izləyən qonaq sonda öz təəssüratlarını muzeyin “Rəylər kitabı”nda bölüşüb. Əslən Azərbaycandan olan, lakin Rusiyada yaşayıb-yaradan yazıçı Nizami Gəncəvi adına Ədəbiyyat muzeyi kimi xəzinənin varlığı ilə fəxr etdiyini qeyd edib.
Yazıçı müəllifi olduğu kitablardan bir neçəsini muzeyin fonduna hədiyyə edib və sonda qonaqla xatirə şəkli çəkilib.
© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.