Oktyabr ayının 12-də Nazim Hikmət adına kitabxanada Azərbaycan ədəbiyyatının görkəmli nümayəndəsi, böyük şair, tanınmış maarifçi və ictimai xadim Əhməd Cavadın anadan olmasının 130 illiyi münasibətilə dəyirmi masa keçirilib. Muzeyin “Yeni və müasir Azərbaycan ədəbiyyatının tədqiqi və təqdimi şöbəsi”nin böyük elmi işçisi, filologiya üzrə fəlsəfə doktoru Göyərçin Mustafayeva da tədbirdə iştirak edib. Əhməd Cavad yaradıcılığının tədqiqatçılarından olan G.Mustafayeva “Milli şairimizin milli irsi” adlı məruzə ilə çıxış edərək dəyirmi masa iştirakçılarına Azərbaycan ədəbi-bədii fikir tarixində istiqlal şairi kimi özünəməxsus dəst-xətti ilə seçilən Əhməd Cavadın sənətkarlıq gücündən, özünəməxsus məktəbindən danışıb.

Tədbirdə bütün qəlbi ilə bağlı olduğu doğma xalqının müstəqillik ideallarına həyatı boyu sadiq qalmış şairin müəllifi olduğu Azərbaycan Respublikasının Dövlət Himni səslənib.

Sonda məktəblilərin ifasında şairin şeirlərindən nümunələr təqdim edilib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.