Oktyabrın 19-21-i tarixlərində Azərbaycan Milli Xalça Muzeyində “Gənc tamaşaçılar üçün muzey” adlı beynəlxalq konfransın açılışı olub. Konfransı mədəniyyət nazirinin müavini Sevda Məmmədəliyeva açaraq bu cür tədbirlərin beynəlxalq təcrübənin öyrənilməsi, paylaşılması baxımından geniş imkanlar yaratdığını, dünya muzey mütəxəssislərinin mədəni əməkdaşlıq əlaqələrini daha da möhkəmləndirdiyini bildirib. Azərbaycan Milli Xalça Muzeyinin direktoru Şirin Məlikova uşaqların muzeylərə cəlb edilməsi, burada onların maraqlarına uyğun mühitin formalaşdırılması məsələlərinin aktuallığını diqqətə çatdırıb, konfransın məqsəd və əhəmiyyətindən danışıb. Əsas məruzəçi, Amsterdam Brilyant Muzeyinin rəhbəri, İCOM MPR Beynəlxalq Komitəsinin İdarə Heyətinin üzvü Byorn Stenvers "Muzeylərin uşaq auditoriyası üzərində dəyişən rolu” mövzusunda çıxış edib.

Konfransda Azərbaycan, Almaniya, Bolqarıstan, Çexiya, Hollandiya, Latviya, Qırğızıstan, Özbəkistan, Rusiya, Serbiya, Türkmənistan kimi ölkələrdən  muzey əməkdaşlarının çıxışları dinlənilib, “Muzeylər və məktəblər: muzey pedaqogikasının üfüqləri”, “Muzeylərdə uşaqlar üçün rəqəmsal materiallar”, “Uşaqlar, yeniyetmələr və valideynlər üçün muzey proqramları”, “Uşaqlar və muzey: muzey mühitində dayanıqlı inkişafın perspektivləri”, “Uşaq auditoriyasının genişlənməsi və dinamikası: inklüziv layihələr” mövzuları üzrə müzakirələr aparılıb.

Konfransda “Ədəbiyyat muzeylərində uşaq auditoriyası ilə müasir iş üsulları” adlı məruzə ilə Nizami Gəncəvi adına Milli Azərbaycan Ədəbiyyatı Muzeyinin "Beynəlxalq əlaqələr və dünya muzeyləri" şöbəsinin müdiri, kulturologiya üzrə fəlsəfə doktoru Nailə Əliyeva da iştirak edib. Məruzəçi ədəbiyyat təmayüllü muzeylərdə azyaşlı auditoriya üçün tədbirlərin, kitab təqdimatlarının, sərgilərin, ustad dərslərinin, vorkşopların təşkili və diqər müasir iş üsulları haqqında məlumat verərək bu sahədə Ədəbiyyat Muzeyinin təcrübəsini paylaşıb.

Konfrans çərçivəsində  “İki Yulius” adlı sərginin açılışı da baş tutmuşdur.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.