Nizami Gəncəvi adına Milli Azərbaycan Ədəbiyyatı Muzeyinin əməkdaşları Dünya Repressiya Qurbanları Gününə həsr olunmuş tədbirdə məruzə ilə çıxış ediblər.

Mirzə Ələkbər Sabir adına kütləvi kitabxanada təşkil edilən tədbiri kitabxananın müdiri Aliyə Həsənli açaraq Azərbaycan tarixinin hüzn və kədərlə dolu səhifəsi olan siyasi repressiyalar dövrü haqqında məlumat verib.

Tədbirdə Hüseyn Cavidin Ev-Muzeyi və İstiqlal Muzeyi ilə yanaşı, Nizami Gəncəvi adına Milli Azərbaycan Ədəbiyyatı Muzeyinin əməkdaşları da iştirak ediblər.

Muzeyin elmi katibi, filologiya üzrə fəlsəfə doktoru Nuranə Əsədullayeva “Əbədi Cavid” mövzusunda məruzə ilə çıxış edərək qeyd edib ki, bütün romantik sənətkarlarda olduğu kimi, Hüseyn Cavid yara­dı­cılı­ğı­­nın da baş­lıca mövzusu olan insan, onun daxili dünyası şai­­rin xüsu­si önəm verdiyi, böyük həssaslıqla incələdiyi mənəvi mə­­kandır.

Nizami Muzeyinin İctimaiyyətlə əlaqələr və informasiya şöbəsinin müdiri, filologiya üzrə fəlsəfə doktoru Nəzmiyyə Yigitoğlu “Azərbaycan repressiya qurbanları Nizami muzeyinin ekspozisiyasında” mövzusunda məruzə ilə çıxış edib. O, XX əsr siyasi repressiyalarının yurdumuzda ilk dalğası olan 1920-ci il faciələrindən bəhs edib, Firidun bəy Köçərli, Xudadat bəy Rəfibəyli taleyindən söz açıb. Nəzmiyyə Yigitoğlu, həmçinin 1937-ci il siyasi repressiyalarının hədəfi olmuş Ömər Faiq Nemanzadə, I Türkoloji Qurultay nümayəndələri, Salman Mümtaz və digər dil, ədəbiyyat  xadimləri haqqında məlumat verib.

Tədbirdə mövzu ilə bağlı slaydlar nümayiş olunub, məktəblilərin ifasında şeir nümunələri səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.