Zəfər Günü ərəfəsində Nizami Gəncəvi adına Milli Azərbaycan Ədəbiyyatı Muzeyinin maraqlı və yaddaqalan ziyarətçiləri olub. Bu ziyarətçilər arasında Azərbaycandakı Türkiyə Səfirliyinin nümayəndələri ilə birlikdə ölkəmizdə səfərdə olan Ömer Faik Oktay və Nurettin Erdoğan qonağımız olub.
Ömer Faik Oktay şəhərimizin görkəmli yerləri ilə maraqlandığı üçün Nizami muzeyini ziyarət etməyi arzuladığını bildirib. Qonaqları zəngin ekspozisiya ilə Ekspozisiyanın qorunması, izahı və audio müşaiyətin təmini şöbəsinin böyük elmi işçisi, filologiya üzrə fəlsəfə doktoru Sevinc Heydərova tanış edib. Azərbaycan ədəbiyyatınının görkəmli nümayəndələrinin həyat və yaradıcılığını əks etdirən ekspozisiya ilə tanış olan ziyarətçiləri XII əsr Azərbaycan ədəbiyyatının ilk qadın şairəsi Məhsəti Gəncəvinin yaradıcılığı xüsusi maraqlandırıb.
Qonaqlara Nizami muzeyindən xatirə olaraq muzeyin baş direktoru Rafael Hüseynovun müəllifi olduğu “Söz məbədi”, görkəmli klassiklərimizin yaradıcılığından bəhs edən və muzeyin ekspozisiyasından görüntülər əks olunan “Məhəmməd Füzuli”, “Nizami Gəncəvi” bukletləri və türk dilində “Məhsəti Gəncəvi” oçerki, “Şirvan şairləri” kitabı təqdim edilmişdir. Zəngin Azərbaycan ədəbiyyatı ilə tanışlıqdan məmnun olduqlarını bildirən ziyarətçilər muzeydən ayrılarkən bütün sahələri əhatə edən, əbədi və sarsılmaz Azərbaycan-Türkiyə qardaşlığının birgəliyi sayəsində yenidən qonağımız olacaqlarını vurğuladılar.
© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.