Kürdəmir rayon Heydər Əliyev Mərkəzində XX əsrdə Azərbaycan aşıq sənətinin görkəmli nümayəndələrindən biri olan Aşıq Şakirin 100 illik yubileyi münasibətilə tədbir keçirilib.

Tədbir Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialının və Kürdəmir rayon Mədəniyyət Mərkəzinin birgə təşkilatçılığı ilə baş tutub.

Yubiley tədbirini giriş söz ilə açan muzeyin Aran regional filialının müdiri, filologiya üzrə fəlsəfə doktoru Yaqut Bahadurqızı Şirvan aşıq mühitinin patriarxı Aşıq Bilalın layiqli davamçısı olan Aşıq Şakir Hacıyevin adının dillər əzbəri olmasından, onun sənətinin milyonlarla insanın qəlbini fəth etməsindən danışıb. Qeyd edib ki, Aşıq Şakir Şirvan aşığı olsa da, onun sənətinə olan məhəbbətin coğrafi məkanı nəinki bütün Azərbaycanı, hətta Qafqaz, Dağıstan, Orta Asiya, İranı əhatə edir. O, ifa etdiyi aşıq havalarından “Şirvan şikəstəsi”, “Kərəmi”, “Zarıncı”, “Səhər-səhər”, “Nə bağ bildi, nə də bağban”, “Boylana-boylana”, “Bala Nərgiz”, “Bakı” və onlarla belə təkarolunmaz sənət incilərinə öz möhürünü  vurub.

Sonra Aşıq Şakirin ifasında lent yazısı “Nə bağ bildi, nə də bağban” aşıq havası səsləndirilib.

Tədbirdə Azərbaycan Aşıqlar Birliyinin sədri, professor Məhərrəm Qasımlı çıxış edərək bildirib  ki, Aşıq Şakir dövrünün, zəmanəsinin ritmi ilə yaşayan, yazıb-yaradan sənətkar olub. O, Mədəniyyət kanalında yayımlanan “Saz-söz axşamı” verilişinin bir neçə buraxılışının Aşıq Şakirə həsr edildiyini söyləyib.

Professor Məhərrəm Qasımlı çıxışında respublikanın mötəbər tədbirlərinin bəzəyi olan sənətkarın el şənliklərinin, toy mağarlarının ən arzulanan qonağı sayıldığını, keçirdiyi məclislərin söz-söhbətinin aylarla dillərdə dolaşdığını, istər lirik sevgi qoşmaları, istər ibrətamiz qoşmaları, istərsə də əmək qəhrəmanlarından bəhs edən mahnılarının eyni həvəslə dinlənildiyini deyib. Məhərrəm Qasımlı qeyd edib ki, aşıq söylədiyi dastanların, nağılların şirinliyi ilə də dinləyicisinin yaddaşına əbədi həkk olunub.

Daha sonra çıxış edən Kürdəmir Regional Mədəniyyət İdarəsinin rəisi Faiq Xudanlı Aşıq Şakirin xanəndə kimi də çox sevildiyini deyib. Bildirib ki, onun ifa etdiyi havalarda muğam gəzişmələri, xırda boğazlar, zəngulələr aşıq havalarına yeni üslub, zənginlik, şirinlik gətirmiş və xanəndələrimiz, müğənnilərimiz onun repertuarından çox şey öyrəniblər.

Tədbirdə jurnalist Tofiq Abdullayev çıxış edərək uzun müddətdən bəri görkəmli şəxslərdən, ziyalılardan, sənət adamlarından ustad sənətkar haqqında topladığı xatirələrdən danışıb. O, bu xatirələrin toplusu olan 3 kitab ərsəyə gətirməsindən bəhs edib. Tofiq Abdullayev ustad sənətkarın 100 illiyi münasibətilə çapdan çıxardığı sonuncu “Aşıq Şakiri ürəklərdə axtarın” adlı kitabını iştirakçılara təqdim edib.

Tədbirdə çıxış edən Kürdəmir rayon İcra Hakimiyyəti başçısının müavini Vəsilə Əsgərli  bildirib ki, hələ XXI əsrin əvvəlində Ulu Öndərimiz Heydər Əliyev milli-mənəvi dəyərlərimizin ayrılmaz parçası olan folklorumuz, aşıq sənəti haqqında demişdi: “Yeni əsrə, yeni minilliyə biz Qorqud irsinin bayrağı altında, Qorqud mənəviyyatını yaşadan insanlar kimi qədəm qoyuruq.” Ulu Öndərin bu dahi kəlamı onun layiqli davamçısı İlham Əliyev, mədəni, mənəvi, humanist layihələrin təmsilçisi, Heydər Əliyev Fondunun prezidenti Mehriban xanım Əliyevanın fəaliyyətinin devizinə çevrilib.

Vəsilə Əsgərli  qeyd edib ki, saz-söz sənətçiləri, aşıqlarımız mənəviyyatımızın, mədəniyyətimizin keşiyində duranlar, bayrağımızı daha uca zirvələrdə dalğalandıranlar sırasındadır. Natiq çıxışının sonunda Aşıq Şakir sənətinin davamçılarına uğurlar arzulayıb.

Məclisin sonunda Aşıq Şakirin nəvəsi AMEA-nın Nəsimi adına Dilçilik İnstitutunun əməkdaşı, filologiya üzrə fəlsəfə doktoru, dosent Qətibə Mahmudova çıxış edərək tədbirin təşkilatçılarına və iştirakçılara ustad sənətkara verdikləri dəyərə görə təşəkkür edib. Qətibə Mahmudova babasının xatirəsinə həsr etdiyi yenicə çapdan çıxmış “Yolun düşsə bu dünyaya  bir də gəl!” adlı kitabını tədbir iştirakçılarına təqdim edib.

Yubiley məclisinin bədii hissəsində Şirvan Aşıqlar Birliyinin sədri, Əməkdar mədəniyyət işçisi aşıq Ağamurad Şirvanlı, tanınmış xanəndə-aşıq Əvəzxan Xankişiyev, Səfalı Əliyev, aşıq Elman Talıstanlı, gənc aşıqlar Qəlbinur İbrahimli, Elçin Rəşidoğlu aşıq Şakirin repertuarından Şirvan aşıq havalarını ifa ediblər.

Sonda Aşıq Şakirin nəvəsi Aşıq Babək Şakirli ustad sənətkarın hər zaman sevə-sevə ifa etdiyi, yaddaşlarda kök salan “Şirvan şikəstəsi”ni ifa edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.