Nizami Gəncəvi adına Milli Azərbaycan Ədəbiyyatı Muzeyinin “Muzeyşünaslıq” və “Azərbaycan mədəniyyəti tarixi” ixtisasları üzrə təhsil alan magistr tələbələri üçün dərslərin daha da praktiki mənimsənilməsi məqsədilə Hacı Zeynalabdin Tağıyevin Ev Muzeyi və Hüseyn Cavidin Ev Muzeyinə ekskursiyalar təşkil edilib.

Tələbələri “Memorial xatirə ev muzeylərinin təşkili və tədqiqinin ümumi nəzəri əsasları” fənnini tədris edən muzeyin elmi katibi, filologiya üzrə fəlsəfə doktoru Nuranə Əsədullayeva və “Muzey kolleksiyaların mühafizəsi və bərpası” fənnini tədris edən elmi işçi sənətşünaslıq üzrə fəlsəfə doktoru Gülsəba Həsənova, Gənc Alim və Mütəxəssislər şurasının sədri Dilbər Hüseynova müşaiyət ediblər.

Onlar repressiya qurbanı olan Hüseyn Cavidin Ev Muzeyinin ekspozisiyasını gəzib, muzeyin fəaliyyətinin mühüm hissəsi olan kolleksiyaların mühafizəsi və tədqiqi haqqında maraqlı məlumatlar əldə ediblər.

Daha sonra Hacı Zeynalabdin Tağıyevin Ev Muzeyi ilə tanış olan tələbələr məşhur mesenatın həyatı və fəaliyyəti haqqında məlumatlandırılıblar. Burada tələbələr elmi kompletləşdirmə və fond istiqamətində praktik biliklər alıblar.

Magistrlar, həmçinin Milli Azərbaycan Tarixi Muzeyində “Şuşa ili”nə həsr olunmuş sərgi ilə tanış olublar. Sərgidə Qarabağ xanlığı və Şuşaya aid ən qədim dövr eksponatları sırasında nümayiş olunan Mir Möhsün Nəvvaba, Xurşidbanu Natəvana və Üzeyir Hacıbəyliyə aid orjinal əşyalar və Pənahəli xanın məzarının başdaşı izləyicilərin marağına səbəb olub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.