Nizami Gəncəvi adına Milli Azərbaycan Ədəbiyyatı Muzeyinin bir qrup əməkdaşı “Tarixi yerlər və abidələr” mövzusunda Şuşa şəhərində keçirilmiş beynəlxalq simpoziumda iştirak ediblər.

“Miras” Mədəni İrsin Öyrənilməsinə Kömək İctimai Birliyinin təçkilatçılığı ilə keçirilən IV beynəlxalq simpoziuma Azərbaycanla yanaşı Türkiyə, Dağıstan, İtaliya və Şimali Makedoniya respublikalarının tarixçi, arxeoloq, antropoloq, filoloq alimləri də qatılıblar.

Nizami Gəncəvi adına Milli Azərbaycan Ədəbiyyatı Muzeyinin əmkdaşları – filologiya üzrə fəlsəfə doktorları Sevinc Heydərova, Nəzmiyyə Yigitoğlu və Gülnar Əqiq konfransda muzeyşünaslıq, filoloji araşdırmalar istiqamətində maraqlı mövzularla çıxış ediblər.

Filologiya üzrə fəlsəfə doktoru Sevinc Heydərova “Azərbaycanın mədəniyyət paytaxtı Şuşa və küldən dirilən abidələr” adlı məruzəsində Nizami Gəncəvi adına Milli Azərbaycan Ədəbiyyatı Muzeyinin zəngin ekspozisiyasında sərgilənən Qarabağın görkəmli şəxsiyyətlərinin həyat və yaradıcılığından söz açmış, muzeyin Xurşidbanu Natəvan adına Qarabağ filialının tezliklə bərpa ediləcəyini qeyd etmişdir.

Filologiya üzrə fəlsəfə doktoru Gülnar Əqiq “Şuşanın tarixi-memarlıq abidələri əbədi nümunələrdə” adlı məruzəsi ilə Azərbaycanın mədəniyyət paytaxtı Şuşanın zəngin memarlığı, tarixi abidələri haqqında maraqlı faktlar göstərmiş, bədii ədəbiyyatda adı çəkilən abidələr arasında Şuşa şəhərində Şərq-İslam mədəniyyətinin əsas atributlarını əks etdirən tikililər haqqında məlumat vermişdir.

Muzeyin digər əməkdaşı, filologiya üzrə fəlsəfə doktoru Nəzmiyyə Yigitoğlu “Qarabağın qədim məişət tərzi və onun bədii ədəbiyyatda inikası” mövzusunda məruzəsi ilə qədim Qarabağ və Şuşa miqyasındakı etnoqrafiya və milli həyat tərzi ünsürlərinin tarixi romanlarda inikası məsələlərinə toxunmuş, yazıçı, folklorşünas Yusif Vəzir Çəmənzəminlinin, Əzizə Cəfərzadənin, İlyas Əfəndiyevin bu mövzudakı romanlarına təhlili yanaşmışdır.

“Tarixi yerlər və abidələr” mövzusunda IV Beynəlxalq Şuşa simpoziumu Şuşanın erməni vandallığına məruz qalmış abidələrinin,  tarixi tikililərinin ziyarəti ilə davam edib. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.