Dekabrın 4-də Azərbaycan Radiosunda “Axşam görüşləri” proqramının tanınmış iş adamı, maarifçi, yazıçı və tədqiqatçı, professor Əli Polada həsr edilən növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında yayımlanan verlişdə söz xiridarı, sənət və sənətkar hamisi Əli Poladın ədəbi və elmi fəaliyyəti haqqında ətraflı məlumat verilib.

Bildirilib ki, həyat fəlsəfəsi yaradıcı, dostluq və sülh olan fikir adamı Əli Polad həyatının böyük hissəsini tədqiqata həsr edib. Ədəbiyyat, musiqi, bütövlükdə mədəniyyət daim onun qayğı və nəvaziş götərdiyi sahələrdir. Əli Polad millətimizə "Təbriz", "Mirzə Əli Möcüz. Şeirləri", "Üç min ilin hikməti", "Ömər Xəyyam. Rübailər", ""Təbrizli bayatılar” və neçə-neçı başqa qiymətli kitablar bağışlayıb.

Əli Poladın Ömər Xəyyama illər öncə aşiq olduğunu deyən akademik Rafael Hüseynov onun şairin rübailərinin müxtəlif dillərdə olan bütün nəşrlərini topladığını, rəssamları cəlb edərək Xəyyam rübailərinə yaraşan 100 tablonun çəkilməsini sifariş etdiyini diqqətə çatdırıb. Qeyd edib ki, Əli Polad şair haqqında araşdırmalar aparıb, Ömər Xəyyamın rübailərini müxtəlif dillərdə zərif musiqinin müşayiəti ilə lentə aldırıb. Bütün bunların yekunu olaraq isə, tarixdə misli olmamış “Xəyyamnamə” yaradıb.

Akademik Rafael Hüseynov bildirib ki, vətən və millət aşiqi olan Əli Poladın soyadı Vahabzadadədir. Lakin əzminə, iradəsinə, gördüyü gərəkli işlərdə möhkəmliyinə görə polad kəliməsi ona çox yaraşır.

Sonda Rafael Hüseynov Azərbaycanın böyük şairi Məhəmmədhüseyin Şəhriyarın sözlərini xatırladaraq deyib: Çalış adın gələndə rəhmət oxunsun sənə, Dünyada səndən qalan axırda bir ad olur.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.