Dekabrın 5-də AZTV-nin “Mədəniyyət” kanalında “Vətənim” verilişinin XIII əsrin böyük şairi Zülfüqar Şirvaniyə həsr edilən növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında yayımlanan verilişdə görkəmli Azərbaycan alimi, şair və mütəfəkkiri Zülfüqar Şirvaninin həyat və yaradıcılığına geniş nəzər salınıb.

Akademik Rafael Hüseynov bildirib ki, XIII yüzildəki ən qüdrətli Azərbaycan şairlərindən biri olan Zülfüqar Şirvani millətinə zəngin irs yadigar qoyub. O, 1934-cü ildə bir ingilis tərəfindən muzeyə hədiyyə olunmuş Zülfüqar Şirvaninin kitabından bəhs edib.

Qeyd edib ki, Zülfüqar Şirvaninin elm aləminə onun farsca qələmə aldığı, 10 min beytdən ibarət olan "Divan"ı məlumdur. Peterburq kitabxanasında saxlanılan həmin “Divan”ı 1934-cü ildə ingilis alimi E.Edvards Londonda nəşr etdirmişdir. Kitabda məhəbbət lirikası üstünlük təşkil edir: "Bu məhəbbət real, insani olmaqla bərabər, fəlsəfi ümumiləşdirməyə də yad deyil. "Divan"ı vərəq-vərəq oxuduqca şairin hansı söz möcüzələri yaratdığının şahidi oluruq. Zülfüqarın həyat yolu, taleyi bütün ayrıntıları ilə bu şeirlərin içərisində gizlənib. Bu kitab bir yoldur, bizi XIII yüzilliyə aparan bir yoldur”.

Alimin sözlərinə görə, Zülfüqar Şirvaninin “Divan”ı təkcə onun irsini öyrənmək baxımından deyil, XIII yüzillikdə ədəbiyyatımızın hansı gücü daşıdığını dərk etmək baxımından da əhəmiyyətlidir. Şairin “Divan”ında 100 misralıq mənzumə də var ki, burada Zülfüqar Şirvani həyatını, kimliyini oxucusuna bəyan edir.

Rafael Hüseynov şairin yaradıcılığında daha çox qəsidələr qələmə aldığını, onun həmin dövrün hadisələrini təsvir edən salnamələrinin də bizə gəlib çatdığını bildirib. Əlavə edib ki, Zülfüqar nəzmlə və nəsrlə altı dildə əsərlər yazdığını, məntiq, təbiət və ilahiyyət elmlərini, lüğət, hədis, fiqh, əruz, musiqi  və başqa elmləri yaxşı bildiyini qeyd edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.