Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialının təşkilatçılığı ilə XX yüzil Azərbaycan ədəbiyyatının ən istedadlı nasirlərindən biri, tarixi roman  janrının görkəmli nümayəndəsi, Xalq yazıçısı, ədəbiyyatşünas alim, pedaqoq, ictimai xadim, filologiya elmləri doktoru, professor Əzizə Cəfərzadənin yaradıcılıq gecəsi keçirilib.

Kürdəmir şəhər 1 saylı tam orta məktəbdə baş tutan tədbiri giriş sözü ilə muzeyin Aran regional filialının müdiri filologiya üzrə fəlsəfə doktoru Yaqut Bahadurqızı açaraq milli təfəkkürümüzün yetişdirdiyi ən önəmli simalardan olan Əzizə Cəfərzadənin keşməkeşli həyatından və məhsuldar yaradıcılığının mühüm mərhələlərindən bəhs edib.

Tədbirdə  yazıçı, filologiya elmləri doktoru, professor Vaqif Sultanlı, folklorşünas alim Tacir Səmimi, muzeyin əməkdaşı Ülviyyə Yusifova, filoloq Flora Əliyeva, Elmira Süleymanova, Vaqif Alıyev və Şəfəq Ağayeva  çıxış edərək Əzizə Cəfərzadənin yaradıcılığındakı özəlliklərdən, onun müəllimlik və  xeyriyyəçilik fəaliyyətindən danışıblar. Bildirilib  ki, Xalq yazıçısı Əzizə Cəfərzadənin yaradıcılığının XX əsr Azərbaycan ədəbiyyatında özünəməxsus yeri var. Çeşidli janrlarda yazmasına baxmayaraq, Azərbaycan ədəbiyyatında daha çox tarixi romanlar müəllifi kimi tanınan yazıçı əsərlərində fakt və qaynaqlardan böyük sənətkarlıqla bəhrələnib.

Diqqətə çatdırılıb ki, Əzizə Cəfərzadə tədqiqatçı alim kimi də Azərbaycan elmi qarşısında təqdirəlayiq xidmətlər göstərib. Onun klassik Azərbaycan ədəbiyyatının, xüsusilə də şifahi ədəbi irsimizin öyrənilməsi sahəsində gərgin elmi axtarışlarının bəhrəsi olan əsərləri həmişə elmi ictimaiyyətin marağına səbəb olub. Əzizə xanım ədəbi və elmi yaradıcılığı pedaqoji fəaliyyətlə uğurlu şəkildə əlaqələndirməyi bacarıb. O, Bakı Dövlət Universitetinin Filologiya fakültəsinin professoru kimi uzun illər Azərbaycanda elmi kadrların hazırlanması işinə layiqli töhfələr verib.

Daha sonra Xalq yazıçısı Əzizə Cəfərzadənin həyat və yaradıcılığını əks etdirən videoslayd və onun haqqında  “Aztelefilm”in çəkdiyi filmdən epizodlar nümayiş etdirilib.

Tədbirin musiqili qonaqları muğam bilicisi, ustad sənətkar Ağakərim Nafiz, tanınmış xanəndə Səfalı Əliyev, balaban ustası Əməkdar mədəniyyət işçisi Rasim Ələsgərov və aşıq Babək Şakirli maraqlı ifaları ilə məclisə rövnəq veriblər.

Sonda Əzizə Cəfərzadənin oğlu, onun irsinin qorunub saxlanmasında böyük xidmətləri olmuş Turan İbrahimov anası ilə bağlı xatirələrindən, yaratdığı ev muzeyindən danışıb. O, Əzizə Cəfərzadənin yeni nəşrdən çıxmış 25 nüsxədən ibarət kitabını muzeyə hədiyyə edib.

Turan İbrahimov tədbirin təşkilinə görə Milli Azərbaycan Ədəbiyyatı Muzeyinin kollektivinə təşəkkürünü bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.