“AzTV”nin “Mədəniyyət” kanalında “Vətənim” verilişinin türk dünyasının böyük şairi Nazim Hikmətə həsr olunmuş üçüncü buraxılışı yayımlanıb.

Veriliş Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında nümayiş olunub.

Akademik Rafael Hüseynov ürəyini, ruhunu şeirə qatıb insanlara bağışlayan böyük şair Nazim Hikmətin ömrünün son illərində qələmə aldığı şeirlərindən söz açıb. O, Nazim Hikmətin şairliyindən başqa, həm də dramaturq olduğunu, onun əsərlərinin tamaşaya qoyulduğunu qeyd edib.

Üçüncü buraxılışda Nazim Hikmət irsinin araşdırmaçısı, türkoloq alim Əkbər Babayevin şairin yaradıcılığı, dühası ilə bağlı qiymətli əsərlər ərsəyə gətirdiyi diqqətə çatdırılıb. Bildirilib ki, Xalq yazıçısı Anar, professor Tofiq Məlikli və professor Aqşin Babayev də böyük türk şairi haqqında dəyərli kitabların müəllifləridirlər.

Akademik Rafael Hüseynov illər öncə muzeyin əməkdaşı, istedadlı bəstəkar Rizvan Sədirxanovun Nazim Hikmət sözlərinə silsilə nəğmələr bəstələdiyini və oxuduğunu bildirib. O, Nazim Hikmət nəğmələrinin notları ilə birlikdə ayrıca kitab kimi də işıq üzü gördüyünü söyləyib. 

Rafael Hüseynov Nazim Hikmətin böyük satira ustası Mirzə Ələkbər Sabirin böyüklüyü, müstəsnalığı haqqında yazdığı sözləri xatırladıb.

Verlişdə professor Şəfəq Əlibəyli, Gündüz Babayev və Etibar Babayev atalarının Nazim Hikmətlə əlaqələrindən, şairlə bağlı xatirələrindən danışıblar.

Üçüncü buraxılışda, həmçinin istedadlı şair-tədqiqatçı Rasim Müzəffərli Nazim Hikmətin "Həsrət" şeirinə bəstələdiyi "Dənizə dönmək istəyirəm" mahnısını ifa edib.

Şairə həsr olunmuş verilişi buradan izləyə bilərsiniz. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.