“AzTV”nin “Mədəniyyət” kanalında “Vətənim” verilişinin türk dünyasının böyük şairi Nazim Hikmətə həsr olunmuş sonuncu, dördüncü buraxılışı yayımlanıb.

Veriliş Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında nümayiş olunub.

Akademik Rafael Hüseynov bildirilib ki, Nazim Hikmət müasir adam idi, çağdaş şeirlər yazırdı. Şairin yazısının tərzi də, fikirləri də XX yüzilin yenilikçi havası ilə dolu idi: "O, özündən yeddi əsr öncə yaşamış Mövlananın yazdıqlarını da bəyənir, müasir hesab edirdi. XVI əsrdə yaşamış Füzulini də, Mirzə Fətəlini də çağdaşı bilirdi. Nazim Hikmət ustadlarından saydığı qoca Füzuli ilə şərik idi".

Diqqətə çatdırılıb ki, Azərbaycan bəstəkarı Arif Məlikov “Məhəbbət əfsanəsi” baletini tanınmış türk şairi Nazim Hikmətin “Fərhad və Şirin” pyesi üzrə libretto əsasında yazıb.

Dördüncü buraxılışda muzeyin əməkdaşı, istedadlı bəstəkar Rizvan Sədirxanovun Nazim Hikmət sözlərinə 20-dən artıq mahnı, romans bəstələdiyi bildirilib. Azərbaycanın tanınmış müğənnilərinin ifasında şairin sözlərinə bəstələnmiş klip nümayiş etdirilib.

Rafael Hüseynov yaxın zamanlarda Nizami muzeyində böyük şairə həsr olunmuş ayrıca bir guşənin yaradılacağını da diqqətə şatdırıb. Qeyd edib ki, Nazim Hikmət dünyanı, həyatı, insanı dərinliyi ilə dərk etməyə başladığı gənc çağlarından insanın ruhunun və varlığının elə onun sözü olduğu həqiqətinə inanmışdı. Nazimin 10 illər əvvəldən gələn sözü də, səsi də bu gün diri və sağdır.

Verlişdə, həmçinin Nazim Hikmətin həyat və yaradıcılıq irsinin tədqiqatçı və təbliğatçılarından olan “Luç” ədəbi birliyinin sədri, professor Tofiq Məlikli şairlə bağlı xatirələrini bölüşüb.

Şairə həsr olunmuş verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.