N.Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialının təşkilatçılığı ilə Azərbaycan Yazıçılar Birliyinin üzvü, şair Abduləziz Xanəhmədoğlunun "Ömrü şeirə dönən Kürdəmir şəhidləri" kitabının təqdimat mərasimi keçirilib.

Əvvəlcə Azərbaycan Respublikasının Dövlət Himni səsləndirilib, ölkəmizin ərazi bütövlüyü uğrunda şəhidlik zirvəsinə ucalan qəhrəman oğullarımızın xatirəsi bir dəqiqəlik sükutla yad edilib.

Tədbirdə çıxış edən Aran filalının müdiri, filologiya üzrə fəlsəfə doktoru Yaqut Bahadurqızı Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında 44 gün ərzində əldə olunan möhtəşəm Qələbənin müstəqillik tariximizin ən böyük zəfəri olduğunu bildirib. Qeyd edib ki, sentyabrın 27-dən başlayaraq cəbhə xəttində işğalçı Ermənistan ordusunun təxribatlarına cavab verən şanlı Azərbaycan Ordusunun qısa zamanda Qarabağ uğrunda başladığı haqq savaşı Qələbə ilə başa çatıb, İkinci Vətən müharibəsində qəhrəman oğullarımız düşmənə sarsıdıcı zərbələr endirərək, onları 27 il işğal altında saxladıqları torpaqlarımızdan qovublar.

Yaqut Bahadurqız Vətən müharibəsi dövründə və ondan sonraki quruculuq dövründə qələmi ilə müsəlləh əsgərə dönən ziyalılarımızın, şair və yazarlarımızın rolunu dəyərləndirərək, Abduləziz Xanəhmədoğlunun yeni çapdan çıxmış “Ömrü şeirə dönən Kürdəmir şəhidləri” kitabından bəhs edib. O, şəhidlərimizin adlarının əbədiləşdirilməsi, həyat tarixçəsinin qan yaddaşına köçürülməsi məramı ilə istedadlı şairin oxuculara təqdim olunan kitabının gənc nəslin hərbi vətənpərvərlik ruhunda tərbiyə edilməsində faydalı olacağını vurğulayıb.

Daha sonra çıxış edən şəhid ailələri Simuzər Bağıyeva, Jalə Mikayılova, Şövqiyə Azayeva, Cəmafət Əzizova,Vətən müharibəsi veteranı Vidadi Hüseynov, jurnalist Tofiq Abdullayev qeyd ediblər ki, “Ömrü şeirə dönən Kürdəmir şəhidləri” kitabında Vətən yanğısını söndürməyə gedən oğullardan bəhs edən şeirlərin oxunaqlı olmağına səbəb müəllifin gördüklərinə, eşitdiklərinə, oxuduqlarına şair təxəyyülünün olmasıdır. Eyni zamanda, kitabın yeniyetmələrə və gənclərə vətənpərvərlik ruhunun, gələcəkdə qəhrəmanlıq, anaya sevgi, saf məhəbbət, dosta sədaqət və s. aşılanması baxımından önəmi qeyd edilib.

Tədbirdə şəhidlərimizə həsr olunan fotoslayd nümayiş etdirilib. Məktəblilər “Ömrü şeirə dönən Kürdəmir şəhidləri” kitabından hazırladıqları kompazisiyanı tədbir iştirakçılarına təqdim ediblər.

Sonda kitabının müəllifi Abduləziz Xanəhmədoğlu onun əməyinə verilən diqqətə görə tədbirin təşkilatçısı olan Nizami Gəncəvi adına Milli Ədəbiyyat Muzeyinin Aran filialına və iştirakçılara minnətdarlığını bildirib.

“Ömrü şeirə dönən Kürdəmir şəhidləri” kitabı şəhid ailələrinə hədiyyə edilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.