AMEA-nın Humanitar Elmlər Bölməsinin (HEB) Elmi şurasının iclası keçirilib.

Tədbiri Humanitar Elmlər Bölməsinin Elmi şurasının sədr müavini, akademik Teymur Kərimli açaraq gündəlikdə olan məsələlər barədə məlumat verib.

Akademik Teymur Kərimli son dövrdə AMEA-da elmi infrastrukturun təkmilləşdirilməsi, tədqiqatların müasir dövrün tələblərinə uyğun və konkret nəticələrə əsaslanaraq aparılması, institutlar arasında paralelliklərin aradan qaldırılması ilə bağlı həyata keçirilən struktur islahatlarından danışıb. Bu istiqamətdə folklorla bağlı araşdırmaların folklor-etnoqrafik baxımdan kompleks şəkildə həyata keçirilməsinin zəruriliyini qeyd edən alim, Folklor İnstitutunun strukturunda dəyişiklik edilməsi məsələsini müzakirəyə təqdim edib. Elmi şuranın üzvlərinin səsverməsi nəticəsində Folklor İnstitutunda Türk xalqları folkloru, Cənubi Azərbaycan folkloru, Qərbi Azərbaycan folkloru, Azsaylı xalqların folkloru və Mərasim folkloru şöbələrinin adında dəyişiklik edilərək, həmin şöbələrin müvafiq qaydada Türk xalqları folkloru və etnoqrafiyası, Cənubi Azərbaycan folkloru və etnoqrafiyası, Qərbi Azərbaycan folkloru və etnoqrafiyası, Azsaylı xalqların folkloru və etnoqrafiyası, Etnoqrafiya və mərasim folkloru adlandırılmasına qərar verilib. 

Akademik Teymur Kərimli Azərbaycan Respublikasında “Elm günü”nün təsis edilməsi haqqında Azərbaycan Respublikası Prezidentinin Sərəncamının əhəmiyyətindən danışaraq cari ildə keçiriləcək tədbirlərlə iclas iştirakçılarını tanış edib. Elmi tədqiqat müəssisələrinin təklifləri nəzərə alınmaqla hazırlanmış Tədbirlər planına əsasən Nizami Gəncəvi adına Ədəbiyyat İnstitutunda orta ümumtəhsil məktəblərinin şagirdləri üçün “Mütaliəni uşaqlara sevdirməyin yolları” adlı diskussiyanın, ali təhsil müəssisələrinin tələbələri ilə birgə “Bədii mətnin təhlil texnologiyası” mövzusunda seminarın keçiriləcəyi bildirilib.  Həmçinin Nəsimi adına Dilçilik İnstitutu tərəfindən Elm və Təhsil Nazirliyinin Fizika-riyaziyyat və informatika təmayüllü respublika liseyinin şagirdləri arasında “Elm günü”nə həsr olunmuş “Ana dili” adlı olimpiadanın, Məhəmməd Füzuli adına Əlyazmalar İnstitutunda “Əlyazma aidələrinin bərpası müasir elmi-texniki müstəvisində” mövzusunda elmi sessiyanın, Memarlıq və İncəsənət İnstitutunda “Milli incəsənətin inkişaf problemləri türk dünyası mədəniyyəti kontekstində” adlı dəyirmi masanın və Folklor İnstitutunda “Gənclik və folklor” adlı elmi seminarın keçirilməsi haqqında qərar qəbul edilib.

Elmi şuranın iclasında Məhəmməd Füzuli adına Əlyazmalar İnstitutunun dissertantının elmi rəhbərinin təyin edilməsi ilə bağlı məsələyə baxılıb.

Sonda HEB-in Elmi şurasının sədr müavini, Məhəmməd Füzuli adına Əlyazmalar İnstitutunun baş direktoru, akademik Teymur Kərimli qarşıdan gələn Norvuz bayramı münasibətilə hamını ürəkdən təbrik edib, AMEA-nın alim və işçi kollektivinə uğurlar arzulayıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.