Bakı Dövlət Universitetinin Filologiya (türk dili və ədəbiyyatı) və Regionşünaslıq (ərəb ölkələri üzrə) fakültələrinin 30 nəfər tələbəsi istehsalat təcrübəsi keçmək üçün Nizami Gəncəvi adına Milli Azərbaycan Ədəbiyyatı Muzeyinin “Doktorantura və elmi inkişaf” şöbəsinə təhkim olunublar. Tələbələrin praktik biliklər qazanması və yeni məlumatlar əldə etməsi üçün müxtəlif mövzularda elmi və təcrübi seminar və ekskursiyalar təşkil edilməsi planlaşdırılıb.

Bu tədbirlər çərçivəsində muzeyin Gənc Alim və Mütəxəssislər Şurasının sədri Dilbər Hüseynova “Akademik yazı qaydaları” adlı məruzə ilə çıxış etmiş, əyani materiallar əsasında izahat verərək tələbələrə praktik biliklər aşılamışdır. “Akademik yazı qaydaları” mövzusunda seminarda buraxılış işini düzgün yazmaq və tərtib etmək üçün tələbələrə əvvəlcə dissertasiyanın strukturunun necə tərtib olunması, ədəbiyyat siyahısının forması, mənbələrə istinad, antiplagiat proqramının iş prinsipləri haqqında məlumatlar çatdırılıb. Daha sonra iştirakçılar mövzu ilə bağlı öz suallarını veriblər.

Həmçinin, Regionşünaslıq (ərəb ölkələri üzrə) ixtisasının tələbələri üçün “İqnati Yulianoviç Kraçkovskinin elmi irsi” mövzusunda elmi seminar baş tutub. Seminarı muzeyin direktor müavini, fəlsəfə üzrə fəlsəfə doktoru Kəmalə Nuriyeva təqdim edib. Məruzəçi rus və sovet şərqşünaslığının banilərindən biri olan İ.Y.Kraçkovskinin həyatı və elmi fəaliyyəti haqqında məlumat verərək alimin ərəbşünaslığın demək olar bütün sahələrində dəyərli elmi əsərlərinin olduğunu və bu tədqiqatlarını orijinal mənbələr, əlyazmalar üzərində apardığını dinləyicilərin diqqətinə çatdırıb. K.Nuriyeva gələcəkdə tədqiqat aparmaq, elmi fəaliyyətlə məşğul olmaq istəyən tələbələrin İ.Y.Kraçkovskiyə müraciət etməli olacaqlarını vurğulayıb. Sonda tələbələri maraqlandıran sualları cavablandırıb.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.