Türkiyənin tanınmış yazıçısı, Yunus  Əmrə İnstitutunun Bakı nümayəndəliyinin rəhbəri Selçuk Karakılıç  Nizami Gəncəvi adına Milli Azərbaycan Ədəbiyyatı Muzeyini ziyarət edib. Qonağı muzeyin zəngin ekspozisiyası ilə filologiya üzrə fəlsəfə doktoru Nərmin Əliyeva tanış edib. 5 ildən çox Bakıda yaşayan Selçuk Karakılıç hər zaman bu möhtəşəm binanı ziyarət etməyi arzuladığını bildirib. Azərbaycan ədəbiyyatının görkəmli nümayəndələrinin həyat və yaradıcılığını əks etdirən ekspozisiya ilə tanış olan qonaq Bəxtiyar Vahabzadə, Əhməd Cavad, Mirzə Ələkbər Sabir, Yunis Əmrə yaradıcılığını əks etdirən eksponatlara xüsusi maraq göstərib. Sonra türkiyəli qonaq muzeyin “Rəylər kitabı”nda təəssüratlarını bölüşərək belə bir muzeyi yaradanlara və yaşadanlara təşəkkür edib. “Füzuli, Nizami, Hüseyn Cavid kimi böyük adları yetişdirən Azərbaycan xalqına minnətdarlığımı bildirirəm” – deyə, yazıçı qeyd edib. Sonda qonağa Nizami muzeyindən xatirə olaraq muzeyin direktoru Rafael Hüseynovun müəllifi olduğu “Söz məbədi” kitabı hədiyyə edilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.