Nizami Gəncəvi adına Milli Azərbaycan ədəbiyyatı Muzeyində Bakı Dövlət Universitetinin Filologiya (türk dili və ədəbiyyatı), Filologiya (fars dili və ədəbiyyatı, urdu dili və ədəbiyyatı) və Regionşünaslıq (ərəb ölkələri üzrə) fakültələrinin IV kurs tələbələri üçün təşkil edilən silsilə seminarlar mövzuların müxtəlifliyi ilə fərqlənir. Burada tələbələrin diqqətini cəlb edən və onların elmi inkişafı üçün faydalı hesab olunan mövzular haqqında ətraflı məlumat verilir, sanballı elmi mənbələrə istinad edilməklə maraqlı faktlar dinləyicilərin nəzərinə çatdırılır. Elmi-praktik seminarların keçirilməsində əsas məqsəd tələbələrin elm mühitinə uyğunlaşmasını, onlarda ixtisas sahəsinə dair biliklərin artırılmasını və hər birinin gələcəkdə əsl mütəxəssis kimi yetişməsini təmin etməkdir.

Mart ayının 27-də tələbələrə təqdim olunan növbəti seminar Azərbaycan Mühacirət ədəbiyyatına və onun görkəmli nümayəndələrindən biri hesab olunan Ceyhun Hacıbəylinin publisistik fəaliyyətinə həsr edilmişdir. Muzeyin “Doktorantura və elmi inkişaf” şöbəsinin elmi işçisi Rəhilə Sadıqova öz çıxışı zamanı Cümhuriyyətin süqutundan sonra yaşamaq üçün əcnəbi ölkələrə üz tutan Azərbaycan ziyalılarının əsas fəaliyyət istiqamətlərindən, onların zəngin ədəbi irsindən söz açıb. Məruzəçi xüsusilə, maarifçi-realist nəsrinin görkəmli nümayəndəsi, dəyərli yazıçı-publisist, tərcüməçi, naşir və ictimai xadim Ceyhun Hacıbəyli yaradıcılığına diqqəti çəkərək, onun publisistik fəaliyyəti haqqında geniş məlumat verib. Məruzədə istiqlal mücahidi, azadlıq fədaisi C.Hacıbəylinin Azərbaycan Cümhuriyyətinin ilk mətbu orqanı olan “Azərbaycan” qəzetinin redaktoru olduğu, eləcə də mühacirətdə yaşadığı zaman Fransada “Azərbaycan” adlı qəzeti təsis etdiyi vurğulanıb.

Tələbələrin maraqla dinlədiyi seminar sonda yaranan sualların cavablandırılması ilə yekunlaşıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.