Azərbaycan Respublikasında 2023-cü ilin "Heydər Əliyev İli" elan edilməsi ilə əlaqədar Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialı tərəfindən Kürdəmir şəhər 1 saylı tam orta məktəbdə “Heydər Əliyevin dövlətçilik siyasətində ədəbiyyatımızın mövqeyi” mövzusunda elmi-ədəbi tədbir keçirilib.

Əvvəlcə Ulu Öndər Heydər Əliyevin və ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan muzeyin Aran regional filialının müdiri, filologiya üzrə fəlsəfə doktoru Yaqut Bahadurqızı “Heydər Əliyevin dövlətçilik təlimində ədəbiyyat siyasəti” mövzusunda  məruzə  ilə çıxış edib. O, məruzəsində Ümummilli Lider Heydər Əliyevin taleyində və siyasi fəaliyyətində ədəbiyyat amilinin rolu və imkanlarının geniş anlayış olmasından, onun sistemli ədəbiyyat bilicisi kimi nadir dövlət xadimi olmasından, dahi liderin hələ gənclik illərindən qeyri-adi mütaliə qabiliyyəti ilə fərqlənməsindən bəhs edib.        

Sonra muzeyin əməkdaşı Ülviyyə Yusifova “Ədəbiyyatımıza Heydər Əliyev qayğısı” mövzusunda təqdimatla çıxış edərək Heydər Əliyevin Azərbaycan xalqının misilsiz sərvəti olan klassik irsə, ümumən bədii ədəbiyyata xüsusi önəm verdiyini, istər ədəbiyyat, istər  teatr və kino sənəti, eləcə də musiqi və rəssamlıq sahələrinə məhz dövlətçilik mənafeləri baxımından yanaşdığını bildirib.

Yazıçı-publisist Əlisəfa Azayev isə çıxışında Ulu Öndərin zəngin və çoxşaxəlı irsinin indiki və gələcək nəsillərə əmanət olmasından, xalqımızın milli sərvəti olmasından bəhs edərək, bu müqəddəs mirası qoruyub saxlamağın hər bir azərbaycanlının vəzifə borcu olduğunu vurğulayıb. O, Heydər Əliyev irsinin öyrənilməsində bu kimi tədbirlərin əhəmiyyətini qeyd edib.

Tədbirdə Kürdəmir rayon İcra Hakimiyyəti Başçısının müavini Vəsilə Əsgərli çıxış edərək Ümummilli Lider Heydər Əliyevin milli-mənəvi taleyimiz, gələcəyə doğru inkişafımız üçün yadigar qoyduğu sərvətlərdən, görkəmli dövlət xadiminin azərbaycançılıq ideyalarından bəhs edib.

Daha sonra Heydər Əliyevin həyatının müxtəlif məqamlarını əks etdirən videoçarx nümayiş etdirilib, həmçinin Milli Azərbaycan Ədəbiyyatı Muzeyinin baş direktoru, akademik Rafael Hüseynovun “Şah əsər – Azərbaycan” albomundan mahnılar səsləndirilib. Azərbaycan Yazıçılar Birliyinin üzvü Yadigar Təvəkkül və Tənzilə Əliyeva Ulu Öndərə həsr etdikləri şeirlərini tədbir iştirakçılarının diqqətinə çatdırdılar.

Sonda şagirdlərin ifasında Ümummilli Lider Heydər Əliyevə həsr olunmuş şeirlər səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.