Nizami Gəncəvi adına Milli Azərbaycan Ədəbiyyatı Muzeyinin əməkdaşları Sankt-Peterburq şəhərindəki Dövlət Ermitajı Muzeyində təşkil olunmuş “Muzey və mədəni turizm problemləri” mövzusunda XXI "dəyirmi masa"da iştirak ediblər.

Hibrit formatda keçirilən tədbirə Azərbaycanla yanaşı, Rusiya, Qırğızıstan, İtaliya, Seneqal və digər ölkələrin alimləri də qoşulublar.  

Beynəlxalq tədbirdə muzeyin Beynəlxalq əlaqələr və dünya muzeyləri şöbəsinin müdiri, kulturologiya üzrə fəlsəfə doktoru Nailə Əliyeva “Azərbaycanda gənc auditoriya ilə işin təşkilində ədəbiyyat muzeylərinin potensialı”, Doktorantura və təhsil şöbəsinin böyük elmi işçisi, filologiya üzrə fəlsəfə doktoru Sevinc Heydərova isə “Müasir muzey və reallıq” mövzusunda məruzələrlə çıxış ediblər.

Məruzələrdə ölkə muzeylərinin müasir dövrdə fəaliyyəti, turizm sektorundakı inkişafın muzeylərin fəaliyyətinə təsiri, o cümlədən insanlarla, xüsusən yeniyetmə gənclərlə maraqlı ünsiyyətin yaradılmasında muzey əməkdaşlarının rolundan bəhs edilib. Həmçinin son illərdə dünya ölkələrində seyr etdiyimiz işıq festivalı effektinin Bakıda – Nizami muzeyinin fasad hissəsində də nümayiş olunduğu diqqətə çatdırılıb. Məruzəçilər bildiriblər ki, dahi şair və mütəfəkkir Nizami Gəncəvinin 880 illik yubileyinə həsr olunmuş işıq festivalının 3D formatında görüntüləri şairin “Xəmsə”sindən  motivləri təsvir edən miniatürlər əsasında hazırlanıb.

Daha sonra rəqəmsal platformaların köməyilə muzey ziyarətlərinin və istifadəsinin daha əlverişli olduğu vurğulanıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.