Nizami Gəncəvi adına Milli Azərbaycan Ədəbiyyatı Muzeyində görkəmli poliqlot dilçi alim, türkoloq, şərqşünas, ədəbiyyatşünas, yazıçı Bəkir Çobanzadənin çoxşaxəli elmi irsi və bədii yaradıcılığına həsr olunmuş elmi seminar məşğələsi keçirilib.
Tədbirdə muzeyin Məktəblərlə və ictimaiyyətlə iş şöbəsinin müdiri, filologiya üzrə fəlsəfə doktoru Nəzmiyyə Yigitoğlu bildirib ki, Bəkir Çobanzadə zaman etibarilə qırx dörd illik ömür yaşasa da türk xalqlarının etnik-mədəni dəyərlərinə, dil və ədəbiyyatına həsr olunmuş qiymətli əsərləri alimə artıq 130-cu baharını yaşadır. O, unudulmaz alimin doğulub böyüdüyü ailə və Krım mühiti, ədibin təhsil illəri haqqında ətraflı məlumat verib. Qeyd edib ki, hələ çox erkən yaşlarından dünya dillərinə bələd olmaq, qədim və ortaq türk xalqları ədəbiyyatını, linqvistikasını öyrənmək eşqi gənc Bəkir Sidqi üçün İstanbul, Budapeşt, Odessa və digər şəhərlərin universitetlərində təhsilin, tədrisin yollarını açıb.
Məruzəçi bildirib ki, Bəkir Çobanzadə Budapeşt Universitetində təhsil aldığı illərdə türkmənşəli qıpçaq-kuman boyunun qədim yazılı abidəsi haqqında dissertasiya işi müdafiə edərək alimlik dərəcəsi alsa da, həmin dissertasiya işi hələ də aşkar olunmamışdır.
Nəzmiyyə Yigitoğlu Azərbaycan ədəbiyyatının müxtəlif dövr və nümayəndələri haqqında silsilə elmi əsərlərin müəllifi, maarif xadimi, professor B.Çobanzadənin 1937-ci ilin amansız repressiyalarına da hədəf olması, türk xalqlarının tərəqqisinə yönəlmiş fəaliyyətinə görə “xalq düşməni” böhtanı ilə qətlə yetirilməsi hadisəsindən də bəhs edib. Qeyd edib ki, həmin dövrün hadisələri alimin həyat yoldaşı Ruqiyyə xanımın, bacısı Züleyxa Çobanzadənin acı taleyindən xəbər verən memuarlarda da əksini tapmışdır.
Elmi seminarda muzey əməkdaşları - professor Xatirə Bəşirli, Tomiris Babanlı və digərləri çıxış edərək Bəkir Çobanzadə irsi haqqında fikirlərini bölüşüblər.
Seminar məşğələsində, həmçinin Bakı Dövlət Universitetinin Şərqşünaslıq fakültəsinin tələbələri də iştirak ediblər.
© Bütün hüquqlar qorunur. Xəbərlərdən istifadə edərkən www.nizamimuuseum.az saytına istinad zəruridir.