Azərbaycan Respublikasının Prezidenti İlham Əliyevin XX əsrin əvvəllərində Azərbaycan mətbuatı tarixində parlaq səhifələr yazmış görkəmli publisist, naşir, pedaqoq, ictimai-siyasi xadim Ömər Faiq Nemanzadənin150 illik yubileyinin qeyd edilməsi ilə bağlı imzaladığı Sərəncama əsasən Bakı Xoreoqrafiya Akademiyasında (BXA) ədibə həsr olunmuş dəyirmi masa keçirilib.

Tədbirdə BXA-nın idarə heyəti və müəllimləri ilə yanaşı, müxtəlif elmi müəssiələrdən nümayəndələr iştirak ediblər.

 Tədbir Ömər Faiq Nemanzadənin İngiltərənin Kembric şəhərində yaşayan nəticəsi, tanınmış rəssam Ülviyyə Pepinovanın video çıxışı ilə başlanıb. Daha sonra Ömər Faiq Nemanzadənin qardaşı nəvəsi Çingiz Nemanzadə ailə xatirələrini danışıb.

Dəyirmi masada Nizami Gəncəvi adına Milli Azərbaycan Ədəbiyyatı Muzeyini təmsil edən əməkdaşlardan - Beynəlxalq əlaqələr və dünya muzeyləri şöbəsinin müdiri, kulturologiya üzrə fəlsəfə doktoru Nailə Əliyeva “Nizami muzeyinin ekspozisiyasında Ömər Faiq Nemanzadənin “Molla Nəsrəddin” jurnalında fəaliyyətinin əksi” və Doktorantura və təhsil şöbəsinin böyük elmi işçisi, filologiya üzrə fəlsəfə doktoru Sevinc Heydərova “Azərbaycan mətbuatı və Ömər Faiq Nemanzadənin fəaliyyəti” mövzularında məruzələrlə çıxış ediblər.

Tədbir çərçivəsində müxtəlif maraqlı məruzələrlə yanaşı Milli Azərbaycan Tarixi Muzeyinin kolleksiyası əsasında hazırlanmış, Ö. F. Nemanzadənin ailəsi tərəfindən təqdim olunmuş arxiv nümunələrindən ibarət fotoalbomun və M.F.Axundov adına Azərbaycan Milli Kitabxanası tərəfindən hazırlanmış “Ömər Faiq Nemanzadə -150” adlı elektron metodik vəsaitin təqdimatı oldu.

Tədbirin sonunda Bakı Xoreoqrafiya Akademiyası rəhbərliyi tərəfindən dəyirmi masa iştirakçılarına təşəkkürnamə təqdim olunub.

© Bütün hüquqlar qorunur. Xəbərlərdən istifadə edərkən www.nizamimuuseum.az saytına istinad zəruridir.