Nizami Gəncəvi adına Milli Azərbaycan Ədəbiyyatı Muzeyində "Nazim Hikmətin yaradıcılığında Azərbaycan sevgisi" mövzusunda növəbti seminar məşğələsi keçirilib. Muzeydə istehsalat təcrübəsi keçən Bakı Dövlət Universitetinin tələbələri seminarın əsas dinləyiciləri olublar. Məruzəni muzeyin "Beynəlxalq əlaqələr və dünya muzeyləri" şöbəsinin kiçik elmi işçisi Aysel Bayramova təqdim edib.

Məruzədə dünya şöhrətli türk şairi, yazarı, dramaturqu Nazim Hikmətin SSRİ tərkibində olan Azərbaycana - Bakı şəhərinə 1923-cü ildən  başlayan silsilə səfəri, bu səfərin təfərrüatları, şairin Bakıya olan sevgisinin yaradıcılığında əksi həm xatirələrə, həm də onun öz şeirlərinə əsaslanaraq danışıldı. Məruzəçi şairin Bakıdakı dostları, onlarla qarşılıqlı münasibətləri, Bakını Türkiyə şəhərlərinə bənzədərək özünə doğma bilməsi kimi məlumatları slayd əsasında qeyd etdi. Aysel Bayramova  onu da dinləyicilərin nəzərinə çatdırdı ki, Azərbaycan ziyalıları Nazim Hikməti nəinki şair, yazıçı olaraq, həmçinin, özlərinə ustad kimi görüblər.

Seminarda onlarin qarşılıqlı şeirlərindən də nümunələr gətirilib, Nazim Hikmətin Bakıya həsr etdiyi maraqlı şeirləri də səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.