Muzeyin əməkdaşı görkəmli alim Mir Cəlal Paşayevin yubileyinə həsr olunmuş tədbirdə iştirak edib + Foto Apr 27, 2023 | 13:39 / Konfranslar, İclaslar

Səbail Rayon MKS-nin təşkilatçılığı ilə görkəmli ədib, pedaqoq, Əməkdar elm xadimi, professor Mir Cəlal Paşayevin anadan olmasının 115-ci ildönümünə həsr olunmuş dəyirmi masa keçirilib.

Tədbirdə Azərbaycan Yazıçılar Birliyinin katibi, Güney Azərbaycan şöbəsinin rəhbəri şair Sayman Aruz, Yeni Yazarlar və Sənətçilər İctimai Birliyinin sədri, yazıçı, kulturoloq Aydın xan Əbilov, Cəlil Məmmədquluzadə Ev muzeyinin böyük elmi işçisi Yeganə Məmmədova və digər qonaqlar iştirak ediblər.

İştirakçılar Mir Cəlal Paşayev haqqında təəssüratlarını bölüşərək, onun bədii və elmi irsinin dəyərli milli-mənəvi sərvətimiz olduğunu vurğulayıblar.

Tədbirdə Nizami Gəncəvi adına Milli Azərbaycan Ədəbiyyatı Muzeyinin Beynəlxalq əlaqələr və dünya muzeyləri şöbəsinin böyük elmi işçisi, filologiya üzrə fəlsəfə doktoru Gülnar Əqiq də iştirak edib. O, “Mir Cəlal Paşayev və Azərbaycan ədəbiyyatşünaslığı” adlı məruzəsində görkəmli alimin ədəbiyyatşünaslıq elminin inkişafında  oynadığı mühüm roldan bəhs edib. Məruzəçi bildirib ki,  cəmiyyətin aktual problemlərini əks etdirən roman, povest və realist hekayələri ilə Azərbaycan bədii ədəbiyyatının zənginləşməsində və ədəbi nəslin yetişməsində müstəsna xidmətləri olan  Mir Cəlal Paşayev bir alim kimi Azərbaycan filologiya elminin inkişafına da öz töhfələrini vermiş və ədəbiyyatşünaslığımızda qüdrətli bir elmi məktəb formalaşdırmışdır. Zəngin bədii təxəyyüllə güclü elmi-nəzəri təfəkkürün sintezi  Mir Cəlal müəllimin həm yazıçılıq, həm də alimlik fəaliyyətinin və böyük uğurlarının əsas məhvəri olmuşdur.

Tədbirdə Yeni Yazarlar və Sənətçilər İctimai Birliyinin və Azərbaycan Respublikasının Prezidenti yanında qeyri-hökumət təşkilatlarına dövlət dəstəyi şurasının birlikdə nəşr etdiyi “Mir Cəlalın fikir dünyası”  kitabçası iştirakçılara təqdim edilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.

Video
Faydalı linklər
Facebook