“Mədəniyyət” kanalında “Vətənim” verilişinin Azərbaycan teatr və kino aktyoru, Xalq artisti Ağasadıq Gəraybəyliyə həsr olunmuş ilk buraxılışı yayımlanıb.

Veriliş Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında nümayiş olunub.

Akademik Rafael Hüseynov bildirib ki, Üzeyir Hacıbəyovun qayğısı sayəsində teatr kursuna yazılan Ağasadıq Gəraybəyli 200 müxtəlif rollarda, qrimlərdə, qiyafələrdə səhnəyə çıxıb. O, Azərbaycan teatrının tarixində heç kimin sayca oynamadıqı qədər rollar oynayıb.

Ağasadıq Gəraybəylinin aktyor kimi üstünlüklərindən danışan Rafael Hüseynov qeyd edib ki, Xalq artisti oynadıqları rolların içərisinə yaşadığı zamanın havasını da əlavə edə bilirdi: "Aktyor oynadıqları rollara möhürünü vurub, onun yaratdığı surətlər yaddaşlarda əbədi qalıb. Ağasadıq Gəraybəyli 1921-ci ildə Cəlil Məmmədquluzadənin "Ölülər" pyesində kefli İsgəndər rolunu oynayıb". 

Diqqətə çatdırılıb ki, 1933-cü ildən ömrünün son gününə qədər Azərbaycan Dövlət Akademik Dram Teatrında çalışıb. O, şəhərin mərkəzində, Xaqani küçəsi 19-da yaşayıb. Burada Bülbüllə, xalq yazıçısı Mirzə İbrahimovla, xalq şairi Süleyman Rüstəmlə qonşu olub. 1988-ci il dekabrın 5-də Bakı şəhərində vəfat edib.

Qeyd olunub ki, Xalq artisti Ağasadıq Gəraybəyli Azərbaycan Tibb Universitetinin rektoru, professor Gəray Gəraybəylinin babasıdır.

Verilişdə professor Gəray Gəraybəyli babası ilə bağlı xatirələrini bölüşüb. 

Xalq artistinə həsr olunmuş verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.