Azərbaycan xalqının igid oğlu, əfsanəvi qəhrəman Mehdi Hüseynzadənin anadan olmasının 105 illiyi Sloveniyanın Nova Qoritsa regionunda təntənəli şəkildə qeyd edilib.

AZƏRTAC xəbər verir ki, tədbirin açılış mərasimi Mehdi Hüseynzadənin abidəsinin və xatirə muzeyinin yerləşdiyi Nova Qoritsanın Şempas qəsəbəsində baş tutub.

Tədbirdə Azərbaycanın və Sloveniyanın Dövlət himnləri səsləndirilib, iki ölkənin nümayəndə heyətləri tərəfindən yerli sakinlər, müharibə veteranlarının iştirakı ilə Azərbaycanın qəhrəman oğlunun şərəfinə ucaldılmış abidə önünə əklillər qoyulub.

Azərbaycan nümayəndə heyətinin üzvləri çıxışlarında “Mixaylo”nun xatirəsini əziz tutduğuna görə Sloveniya dövlətinə və xalqına Azərbaycan hökuməti və xalqı adından təşəkkür ifadə ediblər. Qeyd olunub ki, Sloveniyada Mehdi Hüseynzadənin memorial muzeyinin fəaliyyət göstərməsi, abidəsinə daim diqqət yetirilməsi xalqımız üçün qürurvericidir.

Xarici işlər nazirinin müavini X.Xələfov Mehdi Hüseynzadənin qəhrəmanlığı haqqında məlumatların onun ölümündən 13 il sonra cəmiyyətə açıqlandığını, İkinci Dünya müharibəsində göstərdikləri igidliklərə görə 130-dan çox azərbaycanlı arasında ona 1957-ci ildə “Sovet İttifaqı Qəhrəmanı” adının verildiyini tədbir iştirakçılarının diqqətinə çatdırıb. Mehdi Hüseynzadənin adının əbədiləşdirilməsində, onun haqqında həqiqətlərin üzə çıxmasında və faşizmə qarşı mübarizədə göstərdiyi qəhrəmanlığın təbliğində Azərbaycan xalqının Ümummilli Lideri Heydər Əliyevin misilsiz xidmətlərinin olduğu vurğulanıb.

Tədbir iştirakçılarına Azərbaycan Prezidenti İlham Əliyevin tapşırığı ilə 2007-ci ildə əfsanəvi kəşfiyyatçının bu kənddə abidəsinin, daha sonra isə onun xatirəsinə muzeyin yaradılmasının qısa tarixçəsi çatdırılıb.

Səfir R.Sadıqbəyli 2011-ci ildə Azərbaycan Prezidenti İlham Əliyev və Sloveniya Prezidenti Danilo Türkün birgə iştirakı ilə memorial muzeyinin açılmasının “Mixaylo”nun həm də Azərbaycan və Sloveniya arasında dostluğun rəmzi olduğunu, onun xatirəsinin iki xalqın biri-birinə daha da yaxınlaşmasında xüsusi rol oynadığını vurğulayıb. Sloveniyada qəhrəmanımızın xatirəsinə bəslənilən hörmətin və doğma münasibətin dostluq əlaqələrimizin daha da möhkəmlənməsinə xidmət etdiyi vurğulanıb.

Azərbaycan-Sloveniya parlamentlərarası əlaqələr üzrə işçi qrupun rəhbəri, deputat Ağalar Vəliyev Sovet dönəmində Mehdi Hüseynzadənin adının əbədiləşdirilməsinin təşəbbüskarının Azərbaycan xalqının Ümummilli Lideri Heydər Əliyevin olduğunu, bu xoş ənənənin Prezident İlham Əliyev tərəfindən uğurla davam etdirildiyini bildirib. Mehdi Hüseynzadənin qısa, lakin mənalı ömrünün və şərəfli döyüş yolunun bugünkü və gələcək nəsillər üçün bariz nümunə olduğu diqqətə çatdırılıb.

Sloveniyadan olan natiqlərin çıxışlarında Azərbaycan ilə Sloveniya arasında möhkəm dostluq əlaqələrinin mövcud olduğu bildirilib, Mehdi Hüseynzadə kimi qəhrəman oğul yetişdirdiyinə görə Azərbaycan xalqına minnətdarlıq ifadə edilib. Mixaylonun uzaq bir ölkədən gələrək Sloveniyanın azadlığı uğrunda mübarizədə iştirakı və gənc ömrünü sloven xalqı naminə fəda etməsi minnətdarlıqla yad edilib. Azərbaycan və sloven xalqları arasında sıx bağlılıq və dostluq əlaqələrinin mövcud olduğu, bu bağların möhkəmlənməsində Mixaylo fenomeninin mühüm rol oynadığı vurğulanıb.

Tədbir daha mədəni proqramla davam edib.

Yerli məktəblilər Sloveniyanın azadlığı uğrunda döyüşmüş qəhrəmanların şərəfinə mahnı və şeirlər, musiqi parçaları səsləndiriblər.

Daha sonra iştirakçılar Mixaylonun xatirəsinə yaradılmış muzeylə tanış olublar.

Nümayəndə heyəti, həmçinin Mixaylonun 1944-cü ilin noyabrında alman nasistləri ilə ağır döyüşdən sonra həlak olduğu Vitovlye kəndinə baş çəkib, onun ömrünün son dəqiqələrini keçirdiyi ərazidə yerləşən xatirə lövhəsi önünə əklil qoyub, qəhrəmanın xatirəsini yad edib.

İştirakçılar, həmçinin Trnovo Memorial Parkını ziyarət edərək, burada İkinci Dünya müharibəsi zamanı həlak olmuş azərbaycanlıların xatirəsinə ucaldılmış memorial lövhənin önünə əklillər qoyublar.

Sonda dövlət rəsmiləri, yerli əhali və veteranlar təşkilatlarının nümayəndələrinin iştirakı ilə Çepovan məzarlığında Mehdi Hüseynzadənin məzarı ziyarət olunub.