3-5 may tarixlərində Bakıda keçirilən "Moskva günləri" müxtəlif sərgilər, konsertlər və yaradıcılıq görüşləri ilə yadda qalıb.

Heydər Əliyev mərkəzində Rusiya coğrafiya cəmiyyətinin “Bakı ilk səyyahların obyektivində” adlı sərgi nümayiş edilib, art-qrupların konserti baş tutub. Eyni zamanda Beynəlxalq muğam mərkəzində Ümumilli lider Heydər Əliyevin 100 illik yubileyi münasibətilə şahmat turniri də keçirilib. Mədəni tədbirlər çərçivəsində Səməd Vurğun adına Azərbaycan Dövlət Rus Dram Teatrında “Müasir pyes məktəbi”nin “Ay işığında” teatrı nümayiş edilib.

Tədbirlərin üçüncü günündə rus yazıçısı, “Ədəbiyyat qəzeti”nin (“Literaturnaya qazeta”) uzun illər redaksiya heyətinin sədri və baş redaktoru olmuş Yuri Polyakovla yaradıcılıq görüşü keçirilib. Görüşdə Azərbaycan Yazıçılar Birliyinin birinci katibi, dünya şöhrətli Azərbaycan yazıçısı Çingiz Abdullayev ev sahibliyi edib. Baş tutan görüşdə yazıçılar müasir dünya ədəbiyyatı ilə bağlı fikirlərini səsləndirib, Rusiya-Azərbaycan ədəbi əlaqələri haqqında fikir mübadiləsi aparıb. Daha sonra görüş iştirakçılarının yazıçıların yaradıcılıqları barəsində sualları ətraflı şəkildə cavablandırılıb. Bakıda rus evinin təşkilatçılığı ilə baş tutan tədbirlərdə Nizami Gəncəvi adına Milli Azərbaycan ədəbiyyatı muzeyinin əməkdaşları da iştirak edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.