8 may tarixində Nizami Gəncəvi adına Milli Azərbaycan Ədəbiyyatı Muzeyində Ulu Öndər Heydər Əliyevin ölkə muzeylərinin yaradılması və fəaliyyətinə göstərdiyi qayğıdan bəhs edən elmi seminar məşğələsi keçirilib.

        Məruzəçi – muzeyin “Ekspozisiyanın qorunması, izahı və audio müşaiyətin təmini” şöbəsinin müdiri Tomiris Babanlı, Ümumilli liderin xalqının və vətəninin tərəqqisinə yönəlmiş çoxşaxəli siyasi fəaliyyətində milli ədəbiyyat, mədəniyyət və incəsənət nümunələrinə verilən yüksək dəyərdən bəhs edib. O, qeyd edib ki, Azərbaycan Respublikasına rəhbərlik etdiyi 1970-ci illərdən Heydər Əliyev ölkəmizdə mədəniyyət dəyərlərinin toplanılması, qorunması və daha da zənginləşdirilməsində hər zaman maraqlı olub. Ulu Öndərin tarix diyarşünaslıq muzeylərinin əhəmiyyətini vurğulayan fikirlərinə istinad edərək Tomiris Babanlı bildirib:  “Muzeylər söz yox ki, hər bir vətəndaşın öz diyarının, kəndinin tarixinə bələd olması üçün də vacibdir. Bir sözlə, tarix diyarşünaslıq muzeyləri təşkil etməyin zəruriliyi göz qabağındadır”.

       Daha sonra məruzəçi, sovet hakimiyyətinin maneələrinə baxmayaraq, Səməd Vurğun, Üzeyir Hacıbəyli, Nəriman Nərimanov, Cəfər Cabbarlı və digər sənət, ədəbiyyat xadimlərinin memorial-xatirə, ev muzeylərinin yaradılmasını Heydər Əliyevin müdrik uzaqgörənliyi prizmasından izah edib.

       Tomiris Babanlı Heydər Əliyevin Nizami Gəncəvi adına Milli Azərbaycan Ədəbiyyatı Muzeyinə olan sevgisi, ziyarətləri haqqında da geniş məlumat vermiş, Ulu Öndərin ədəbiyyat muzeyinin tarixi əhəmiyyəti barəsindəki fikirlərini vurğulamışdır.

         Seminar məşğələsi muzey əməkdaşlarının sual və çıxışları ilə davam etmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.