Üzeyir Hacıbəylinin ev muzeyinin və “Aytam” UMMİB-nin təşkilatçılığı ilə Ümummilli lider Heydər Əliyevin anadan olmasının 100 illiyinə həsr olunmuş “Xalq Heydər söyləyəcək” adlı tədbir keçirilib.

 Tədbiri ev-muzeyin Ekspozisiya şöbəsinin müdiri Gülnarə Ələsgərova açaraq Heydər Əliyevin Azərbaycanda ayrı-ayrı görkəmli sənətkarların ev muzeyləri şəbəkəsinin yaradılmasında, eləcə də görkəmli mədəniyyət xadimi Üzeyir Hacıbəylinin ev muzeyinin açılması istiqamətində səmərəli xidmətlərindən danışıb. O, Azərbaycan Respublikası Dövlət himninin vaxtilə sənətkarın yaşadığı bu evdə ərsəyə gəldiyini qeyd edərək bu müqəddəs ocağın mühüm tarixi əhəmiyyətini vurğulayıb.

Nizami Gəncəvi adına Milli Azərbaycan Ədəbiyyatı Muzeyinin Məktəblərlə və ictimaiyyətlə iş şöbəsinin elmi işçisi Ceyran Qənbərli çıxışında keçirilən tədbirin gənc nəslin tərbiyəsi, uşaqların bədii-estetik zövqünün formalaşması istiqamətindəki mühüm əhəmiyyətini qeyd edib. C.Qənbərli onu da vurğulayıb ki, müasir müstəqil Azərbaycan dövlətinin qurucusu Heydər Əliyevin anadan olmasının 100 illiyinin bu ocaqda keçirilməsinin həm də rəmzi mənası var. Belə ki, hər iki dahi xalqın milli-mənəvi dəyərlərinin, mədəniyyətinin inkişafında, azərbaycançılığın formalaşmasında əvəzsiz xidmətlər göstəriblər. Bu fenomen şəxsiyyətlərin əməli fəaliyyətləri onların əsrlər boyu yaşayacaqlarının göstəricisidir.

Nizami muzeyinin əməkdaşı ilə yanaşı Azərbaycan Vətən Müharibəsi Veteranları İctimai Birliyin Xankəndi şəhəri və Xocalı rayon şöbəsinin sədri Ramiz Ağayev və “Aytam” UMMİB-nin sədri Aygün Zamanlı da tədbirdə qonaq qismində çıxış edənlər sırasında olub.

Tədbir “Aytam” UMMİB-nin üzvləri – Azərbaycan Milli Konservatoriyası nəzdində Musiqi Kollecinin tələbələri və Bakı şəhərinin ayrı-ayrı məktəblərinin şagirdlərinin ifalarında Ulu Öndərə həsr olunmuş şeir və mahnıların ifası ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.