Səbail rayon Mərkəzləşdirilmiş Kitabxana Sisteminin 3 nömrəli filialı 11 may 2023 -cu il tarixində “Azərbaycanı gələcəyə aparan lider” Heydər Əliyev -100 adlı tədbir keçirib.

Təşkil olunan tədbirdə AMEA-nın Nizami Gəncəvi adına Ədəbiyyat İnstitutunun direktorunun müşaviri Əlizadə Əsgərli, Fəlsəfə və Sosiologiya institutu “İdrak nəzəriyyəsi və məntiq” şöbəsinin müdiri, fəlsəfə elmləri doktoru Füzuli Qurbanov, Nizamı Gəncəvi adına Ədəbiyyat Muzeyinin ədəbi lahiyələr və nəşrlər şöbəsinin böyük elmi işçisi, filologiya üzrə fəlsəfə doktoru Afət Qədirova, AMEA-nin Füzuli adına Əlyazmalar İnstitutunun aparıcı elmi işçisi tarix üzrə fəlsəfə doktoru, dosent Aynur Hacıqədirli iştirak ediblər.

Muzeyin əməkdaşı Afət Qədirova “Heydər Əliyev və mədəniyyətimiz” adlı məruzəsində Ulu Öndər Heydər Əliyevin mədəniyyətimizin inkişafına yönələn qərarlarının yalnız fərman və sərəncamlarda ifadəsi ilə kifayətlənmədiyini, çox zaman bu işlərə birbaşa nəzarət etdiyini, özü də bilavasitə yaradıcı prosesin iştirakçısı olduğunu vurğulayıb. Heydər Əliyevin mədəniyyət sahəsində həyata keçirdiyi layihələr sırasında şair və ədiblərin məzarüstü abidələrinin ucaldılması, tarixi mavzoleylərin bərpa-rekonstruksiyası ilə yanaşı ayrı-ayrı şair və yazıçıların ev muzeylərinin açılması kimi işləri qeyd edib. A.Qədirova onu da bildirib ki, “xalqımızın uzun əsrlər boyu inkişaf edib formalaşan mədəniyyət tarixində xüsusi xidmətləri olan şəxsiyyətlərinin unudulmaması, təbliğ edilməsi H.Əliyevin təbiətinə məxsus olan milli təəssübkeşliklə bağlı idi.” Ulu öndərin fəaliyyəti sayəsində Nizami, Nəsimi, Füzuli kimi söz nəhənglərinin yubiley tədbirlərinin keçirilməsi, “Kitabi-Dədə Qorqud” dastanının 1300 illiyinə həsr edilmiş silsilə tədbirlərin təşkil edilməsi beynəlxalq səviyyədə əks-səda doğurmuşdu. Məruzəçi, məhz həmin tədbirlərin nəticəsində dünyanın Azərbaycanı qədim mədəniyyət ölkəsi kimi tanımağa başladığına diqqəti çəkib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.